اسلام آباد ۔ 22 اپریل (اے پی پی) وزیراعظم محمد نواز شریف آکھے جو بلوچستان کوں پاک چین اقتصادی راہداری منصوبے نال ساریاں توں ودھ فیدہ تھیسی ، صوبے دے لوکیں دی سماجی تے اقتصادی چنگائی پہلی ترجیح ہے۔ انہاں اے گالھ وزیراعلیٰ بلوچستان سردار ثناء اﷲ خان زہری نال گالھ مہاڑ اچ آکھی جنہاں جمعے کوں وزیراعظم ہائوس اچ انہاں نال ملاقات کیتی۔ وزیراعظم آکھیا جو بلوچستان انہاں دے دل دے نیڑے اتے او ذاتی طور تے صوبے اچ جاری منصوبیاں تے اگوہیں دی نگرانی کریندے پئے ہن ۔ انہاں آکھیا جو موجودہ حکومت سارے ملک اچ ترقیاتی ایجنڈے دیاں سرگرمی دے نال ٹُردی پئی ہے ۔ انہاں آکھیا جو گوادر بہوں تکھے ہک جدید صنعتی پورٹ سٹی بنڑ ویسی اتے ایندے نال بلوچستان اتے علاقے دے لوکیں دیاں زندگیاں اچ تبدیلی امسی ۔ وزیراعلیٰ بلوچستان وزیراعظم کوں صوبے اچ جاری مختلف فلاحی سکیماں اتے ترقیاتی منصوبیاں دی صورتحال بارے وی ڈسایا۔ انہاں آکھیا جو صوبے اچ امن تے استحکام دی بحالی دے بعد توجہ دا مر کز صوبے کوں ملک دے بئے حصے دے برابر گھن آونڑ ہے ۔انہاں آکھیا جو صوبے اچ امن و امان دی مجموعی صورتحال اچ بہوں ساری بہتری آئی ہے اتے بلوچستان دے لوک وفاقی حکومت دا شکریہ ادا کریندے ہن ۔
