اٹلی ،حکومت دا بالاں دی پیدائش تے بونس ڈبل کرنڑ دا منصوبہ

روم ۔ 16 مئی (اے پی پی)اٹلی دی حکومت ملکی گھٹ شرح پیدائش نال نبڑنڑ سانگے بالاں دی پیدائش تے بونس ڈبل کرنڑ دا منصوبہ بنڑا گھدا ۔وزیر صحت بیٹرس لورنزین گزریل ڈینھ ہک بیان اچ آکھیا ہے جو ملک اچ شرح پیدائش تباہ کن حد تئیں گھٹ تھی گی ہے جیں دے ازالے سانگے ودھ بالاں دے حامل والدین دی بونس دی رقم کوں ودھایا ویسی ۔انھاں آکھیا جو ایں ویلھے بالاں دی پیدائش تے بونس دی رقم 80 یورو (90 ڈالر) ہے جڈاں جوڈوجھے تے تریجھے بال سانگے ایں رقم کوں ڈبل کر ڈتا ویسی ۔انہاں دا آکھنڑ ہا جو اگر ملک اچ شرح پیدائش ایں طرح گھٹ رہی تاں اگلے ڈاہ سال دے دوران بالاں دی سالانہ پیدائش 3لکھ 50ہزار توں گھٹ تھی ویسی ایں سانگے او چاہندیاں ہن جو جوڑیں کوں ودھ بالاں دی پیدائش دے پاسے توجہ ڈیواونڑ سانگے انہاں دے بونس اچ ودھارا کیتا ویسی ۔