تھائی لینڈ دے سکول وچ بھاہ لگنڑ نال، 17 طالبات ہلاک

بنکاک۔ 23 مئی (اے پی پی) تھائی لینڈ وچ ہک سکول دے ہاسٹل وچ لگنڑ آلی بھاہ دے نتیجے وچ 17 چھوہریں ہلاک تھی گئیاں۔ذرائع ابلاغ دے مطابق پولیس دا آکھنڑ ہے جو ایہ واقعہ چیانگ رائے وچ پیش آیا ۔اتوار دی رات کوں بھاہ ایجھے ویلھے لگی جڈنڑ 5 توں 13 سال عمر دیاں ایہ بالڑیاں ستیاں پئیاں ہن ۔ہک مقامی اہلکار فرانسیسی خبر رساں ادارے کوں ڈسائی جو 38 طالبات اوں ٹائم اتھاں موجود ہن۔حادثے وچ 17 طالبات ہلاک اتے 5 زحمی تھی گئیاں جڈانجو ڈولاپتہ ہن۔پولیس دا آکھنڑ ہے جو بھاہ لگنڑ دی وجہ حالی تئیںپتہ نی لگ سگیا ۔مقامی میڈیا تے ڈکھائے گئے مناظر وچ ڈٹھا ونج سگدے جو چیانگ رائی نامی علاقے وچ ڈو منزلہ عمارت کوں بھاہ اپنڑی وکیڑاچ گھد اہویا ہے جڈانجو بھاہ وسماونڑ آلے اہلکار ایندے تے قابو کرنڑ دی کوشش وچ ہن۔علاقے دے نائٹ گورنر ارکوم ساکاپن دا آکھنڑ ہا جو کجھ طالبات جاگدیاں پئیاں ہن ایں وجہ توں اوہ بچ نکلنڑ وچ کامیاب رہیاں۔پرڈوجھیاں بالڑیاں ستیاںپئیاں ہن اتے نکل نی سگیاں اتے ایندی وجہ نال ہلاکتاں تھی گئیاں۔مرنڑ آلیاں طالبات دیاں لاشاں شناخت سانگے ہسپتال پجا ڈتیاں گن جڈانجو لاپتہ طالبات کوں لبھنڑ سانگے کوششاں جاری ہن۔حادثے داشکار تھیونڑ آلے ایں نجی سکول وچ زیادہ تر پہاڑی علاقیاں دیاں طالبات زیرتعلیم ہن۔