اسلام آباد ۔ 17 مئی (اے پی پی) وفاقی وزیر خزانہ اسحاق ڈار آکھیا جو دھرنے آلے پہلے وی کلھے ہن اتے ہنڑ وی کلھے رہ ویسن،2018ء دے انتخابات اچ ولا مسلم لیگ(ن) کامیاب تھیسی،احستاب سانگے پارلیمانی کمیٹی نال ٹی او آرز بنڑاونڑ سانگے تیار ہیسے،میثاق جمہوریت تے 2018ء دے بعد وی عمل کریسوں،آندے انتخابات توں پہلے 10ہزار میگاواٹ بجلی سسٹم اچ رلیسوں،2سالیں بعد ملکی مجموعی پیداوار دی شرح نمو7فیصد تئیں پج گئی اے،21جون کوں فور جی دے بئے لائسنس بولی نال ڈتے ویسن۔اے گالھ انہاں ٹیلی کمیونیکیشن ڈے دی تقریب نال خطاب اتے میڈیا نال گالھ مہاڑ کریندیں ہوئیں آکھی۔انہاں آکھیا جو سرکاری ملازماں دی تنخواہواں اچ ودھارے سانگے بجٹ توں پہلے ہک کمیٹی بنڑائی ویسی جیڑھی جو حالات دا جائزہ گھن کراہیں تنخواہواں اچ ودھارے دی سفارشات حکومت کوں ڈیسی۔انہاں ہک سوال دے جواب اچ آخھیا جو ڈیجیٹل ایویلیوشن ملک دی ترقی تے خوشحالی دی ضامن اے ،وزارت آئی ٹی ترائے سالیں اچ مطلوبہ نتیجے ڈتن ۔انہاں آکھیا جو اپوزیشن کوں یکا آکھداں جو پاکستان دی معیشت کوں بہتر تھیونڑ ڈیون،نینگراں اچ بہوں صلاحتیاں ہن ،انہاں دے مستقبل نال نہ کھیڈیا ونجے۔ہک سوال دے جواب اچ انہاں آکھیا جو اپوزیشن کوں ولا ولا دعوت ڈیندوں جو ملکی ترقی سانگے انتشار اتے دھرنیاں دی سیاست کوں ترک کر تے بہہ کراہیں گالھ کرن،پانامہ پیپرز اچ انہاں دا ناں کائنی پر انہاں ولا وی خود کوں احستاب سانگے پیش کرنڑ دا اعلان کیتا،اپوزیشن پہلے ایف آئی اے،ولا عدالتی کمیشن،ریٹائرڈ جج اتے اخیر اچ احتساب بیورو توں احتساب کراونڑ دے مطالبے کیتے۔ہک بئے سوال دے جواب اچ انہاں آکھیا جو وزیر اعظم کھلے دل نال سپیکر کوں اختیار ڈتے جو احستاب سانگے ضابطہ کار بنڑا ونڑ سانگے سینیٹ اتے قومی اسمبلی دی سانجھی کمیٹی بنڑاون جیڑھی جو احستاب سانگے قواعدو ضوابط بنڑاوے۔
