اسلام آباد ۔ 21 مئی (اے پی پی) قومی اسمبلی دی خارجہ تعلقات کمیٹی دے چیئرمین رکن قومی اسمبلی سردار اویس احمد خان لغاری پاک چین تعلقات دی 65 ویں سالگرہ تے ساری قوم کوں مبارخ دیندے ہوئیں آکھے جو ڈوہائیں ملکاں دے تعلقات سٹرٹیجک سطح توں اگوں ودھ تے اقتصادی تعاون اتے خطے دے اجتماعیت آلے پاسے ٹردے پئے ہن ۔ پاک چین مشترکہ منصوبیاں دی تکمیل نال بھارت دی خطے دے تسلط قائم کرنڑ دی جنونی خواہش مک ویسی ۔ پاک چین اقتصادی راہداری منصوبے تے کالا باغ ڈیم آلی کار سیاست نہ کیتی ونجے اتے منصوبے کوں ایں طرح توڑ پجایا ونجے جیہڑی طرح پاکستان دے ہر بال اتے ہر سیاسی جماعت رل تے ایٹمی پروگرام کوں پورا کیتا ہئی ۔ ”اے پی پی” کوں ہک خصوصی انٹرویو ڈیندے ہوئیں انہاں پاک چین تعلقات دی ساریاںتوں چنگی گالھ تاں اے ہے جو انہاں دے تعلقات اچ اج تئیں کئی وی رخنہ کائنی آیا، جڈانجو ڈوہائیں ملکاں دے باہمی تعلقات مسلسل چنگے تھئے ہن ۔ انہاں آکھیا جو افغانستان بارے چار فریقی گروپ اچ وی چین دا وڈا اہم کردار ہے خاص طور تے خطے اتے افغانستان بارے بھارت دی ساریاں کوں کنٹرول کرنڑ دی جنوبی خواہش ہے۔ انہاں آکھیا جو پاکستان اتے چین آپنڑیں تعلقات نال ایں خطے اچ آپنڑاں وجود رکھنڑ اں چاہندے ہن جڈانجو ڈوہائیں ملک اچ چاہندے ہن جو ایں خطے دے سارے ملک آپس اچ ہم آہنگی دے نال خطے دے لوکیں دی فلاح و بہبود کیتے کم کرن۔ انہاں آکھیا جواساکوں امید ہے جو خطے تے اگوں تے انہاں تعلقات دے چنگے اثرات مرتب تھیسن ۔ ہک سوال دے جواب اچ سردار اویس لغاری آکھیا جو پاک چین تعلقات اچ ذمہ داری دے نال اگوں ودھنڑاں چاہیدے ۔
