اسلام آباد ۔ 26 مئی (اے پی پی) وزیر داخلہ چوہدری نثار علی خان دی بلوچستان اچ امریکی ڈرون حملے دے معاملے تے پریس کانفرنس کو ںعالمی میڈیا نمایاں کوریج ڈتی ہے ، اتے وزیر داخلہ دے مؤقف کو ںاجاگر کیتا گئے ۔ امریکی اخبار واشنگٹن پوسٹ وزیر داخلہ ولوں ڈرون حملے کوں پاکستان دی خود مختاری اتے عالمی قوانین دی خلاف ورزی قرار ڈیندے ہوئیں نمایاں طور تے شائع کیتے اتے آکھے جو پاکستان دے وزیر داخلہ ڈرون حملے دی ودھ ساری مذمت کیتی ہے۔ اخبار لکھے جو وزیر داخلہ دے مطابق پاکستان کوں حملے دے 7 گھنٹے بعد سرکاری طورتے حملے دی خبر ڈتی گئی ہے اتے ڈسایا گئے جو ملا منصور کوں پاکستان اچ نشانہ بنڑا تے ہلاک کرڈتا گئے ۔ اخبار دے مطابق وزیر داخلہ ایں گالھ کوں وی رد کرڈتے جو ملا منصور افغانستان اچ امن کیتے خطرہ ہئی انہاں ڈسایا ہے جو او طالبان اتے افغان حکومت وچال پہلے بالمشافہ مذاکرات اچ شریک ہئی جیکوں جولائی 2015ء اچ حکومت پاکستان شروع کیتا ہئی ۔ اخبار دے مطابق وزیر داخلہ واضح کیتے جو ملا عمر تے حملے دی خبر لیک کرتے وی امن عمل کوں سبوتاژ کر ڈتاگیا ہئی ۔ امریکی اخبار نیو یارک ٹائمز لکھے جو پاکستان دے وزیر داخلہ امریکی حملے کوں عالمی قنون دی خلاف ورزی اتے ایں کوں بلاجواز، ناقابل قبول اتے غیر قنونی قرار ڈتے ۔ معروف برطانوی اخبار ”دی گارڈین” لکھے جووزیر داخلہ امریکی حملے دی کھل تے مذمت کیتی ہے اتے ایں کوں ملک دی خود مختاری اتے عالمی قوانین دی خلاف ورزی قرار ڈتے ۔ اخبار وزیر داخلہ دے حوالے نال لکھے جو ملا منصور دی ہلاکت نال امن دا عمل متاثر تھیسی اتے امریکہ حملے دا جو جواز ڈتے جیکر ایں کوں من گھدا ونجے اتے ملک اے مؤقف اختیار کرگھنے تاں دنیا اچ جنگل دا قنون ہوسی ۔
