قومی اسمبلی اجلاس،پاک چین اقتصادی راہداری منصوبے نال پورے ملک کوں فائدہ تھیسی،وفاقی وزیر منصوبہ بندی تے ترقی احسن اقبال

اسلام آباد ۔ 10 مئی (اے پی پی)وفاقی وزیر منصوبہ بندی تے ترقی احسن اقبال آکھیا اے جو پاک چین اقتصادی راہداری منصوبے نال ملک دا کوئی وی حصہ محروم کائناں رہسی ،اے پورے ملک دا منصوبہ ہے جیرھا جو 2014توں 2030تئیں مرحلہ وار پورا تھیسی ‘ پوری قوم رل تے اتحاد تے یکجہتی دے نال ایں منصوبے کوں پورا کرے ،ایں منصوبے نال معیشت بہتر تھی ویسی جیں نال پورے ملک دی پسماندگی کوں پرے کرنڑ اچ مدد ملسی ۔منگل کوں قومی اسمبلی دے اجلاس دے دوران شاہ جی گل آفریدی آکھیا جو پاک چین اقتصادی راہداری منصوبے دے تحت 46 ارب ڈالر دی سرمایہ کاری آندی پئی ہے’ فاٹا دے لوکاں قربانیاں ڈتیاں ہن ۔ فاٹا کو ں ایں وچ ہک منصوبہ وی نی ڈتا گیا ۔ اساں محب وطن پاکستانی ہوں اساکو نظر انداز نہ کیتا ونجے ۔ انہاں آکھیا جو وزیراعظم جیرھا کمیشن بنڑائے اساں ایندی حمایت کریندوں ۔ حکومت احتساب بل لاوے تاں جو آئندہ کوئی وی کرپشن دی جرت نہ کر سگے ۔ایندے تے احسن اقبال آکھیا جو سی پیک 2014ء توں 2030 تئیں دا منصوبہ ہے۔ پہلے مرحلے اچ توانائی دا بحران مک ویسی۔ 46 ارب اچ توں 35 ارب ڈالر دے منصوبے توانائی دے بحران تے خرچ تھیسن۔ انہاں منصوبیاں اچ 11.3 ارب ڈالر سندھ’ اتے بلوچستان سانگے 9.1 ارب ڈالر مختص ہن۔ داسو اتے دیامر بھاشا ڈیماں کوں حکومت اپنڑے وسائل توں شروع کر چکی ہے۔ اساکوں شمسی توانائی دے پاسے ونجنڑاں ہے۔ کولیں نال بجلی پیدا کرنڑ اتے انحصار کیتا ویندا پئے ۔ 2018تئیں پاکستان بجلی اچ خود کفیل ہوسی اتے ایندا فائدہ پورا ملک چیسی ۔انہاں آکھیا جو ڈیرہ اسماعیل خان توں وی سڑک دا افتتاح وزیراعظم کجھ ڈینھ اچ کریسن ۔ اگر معیشت ترقی ناں کریندی تاں کوئی وی غیر ملکی مالیاتی ادارہ قرضہ نہ ڈیندا