میڈرڈ ۔ 09 مئی (اے پی پی) سربیا دے نامور ٹینس سٹار اتے عالمی نمبر ہک نوویک جوکووچ میڈرڈ اوپن ٹینس ٹورنامنٹ جت گھدا۔ ایہ سربین سٹار دا ریکارڈ 29 واں ماسٹرز ٹائٹل ہے جیرھا انہاں اپنڑے ناں کیتا۔ نوویک جوکووچ دا ایہ میڈرڈ وچ ڈوجھا اتے اجوکے سال دا پنجواں ٹائٹل ہے، انہاں فائنل وچ انگلینڈ دے اینڈی مرے کوں ہرا تے ٹائٹل جیتا۔ تفصیلات دے مطابق سپین دے دارالحکومت میڈرڈ وچ کھیڈے گئے اے ٹی پی مینز سنگلز مقابلیاں دے فائنل وچ سربیا دے نوویک جوکووچ شاندار کارکردگی دا مظاہرہ کریندے ہوئیں پہلے سیٹ وچ اینڈی مرے کوں 6-2 نال شکست ڈتی تاہم برطانوی کھلاڑی کم بیک کریندے ہوئیں ڈوجھا سیٹ 6-3 نال جیت گھدا۔ سربین کھلاڑی تریجھے سیٹ وچ قدرے چنگا کھیڈ پیش کریندے ہوئیں عالمی نمبر ڈو انگلینڈ دے اینڈی مرے کوں 6-3 نال ہرا تے ٹورنامنٹ جیت گھدا۔ ٹائٹل جیتنڑ دے بعد میڈیا نال گالھ مہاڑ کریندے ہوئیں نوویک جوکووچ آکھیا جو اوہ اپنڑی ایں کامیابی تے بہوںخوش ہن اتے انہاں کوں دیر تائیں یاد رکھیسن، انہاں آکھیا جو ا وہ اپنڑی ایں کامیابی دے تسلسل کوں مستقبل وچ وی جاری رکھنڑ دی کوششاں جاری رکھیسن۔ ایندے توں پہلے ٹورنامنٹ دے پہلے سیمی فائنل وچ عالمی نمبر ڈو برطانیہ دے اینڈی مرے عالمی نمبر پنج ہسپانوی ٹینس سٹار رافیل نڈال کوں چنگے مقابلے دے بعد ہرا تے فائنل اچ پجے ہن۔ ایونٹ دے ڈوجھے سیمی فائنل وچ عالمی نمبر ہک سربیا دے نواک جوکووچ عالمی نمبر چھی جاپان دے کائی نیشیکوری کوں دلچسپ مقابلے دے بعد ہرا تے فائنل کھیڈنڑ دا اعزاز حاصل کیتا ہائی۔
