اسلام آباد ۔ 28 مئی (اے پی پی) وزیراعظم محمد نواز شریف جیڑھے ایں ویلے برطانیہ دے دارالحکومت لندن اچ دل دے ہک آپریشن کیتے رہندے پئین، حکومتی امور دی مکمل نگرانی کر یندے پئین ، وزیراعظم دے پرنسپل سیکرٹری، ملٹری سیکرٹری اتے ڈوجھے عملہ دے ا رکان ملکی امور کوں نبھاونڑ اچ معاونت کریندے پئین۔ وزیراعظم آفس دے میڈیا ونگ ولوں ہفتہ کوں جاری بیان اچ آکھیا گیا اے جیڑھا لندن اچ وزیراعظم کو ںمعمول دے ملکی امور توں متعلق آگاہ رکھا ویندا پیا اے اتے متعلقہ شعبیاں کوں انھاں دی ہدایات من و عن پچائی ویندی پئی اے۔ بیان اچ آکھیا گیا اے جو وزیراعظم وفاقی وزرائ، کابینہ دے ارکان اتے ڈوجھے متعلقین نال مسلسل رابطے اچ ہن۔وزیر اعظم دے ڈاکٹرز دے مشورے تے لندن اچ دل دی سرجری کیتی ویسی اتے سرجری دے بعد ڈاکٹراں دے مشورے دے مطابق ای وطن واپسی امسن،آندے کجھ ڈینھاں اچ آپنڑے آپریشن دے بعد وزیر اعظم کوں ملک دے چیف ایگزیکٹو دی حیثیت نال کجھ ڈینھ سانگے آپنڑی ذمہ واریاں چھوڑنڑی پمسن ۔وزیر اعظم دے دفتر ولوں جاری بیان اچ بئیا آکھیا گئیا جو وزیر اعظم دے سابقہ علاج،تشخیص ،طبی معائنیاں اتے سفری خرچے انہاں دا ٹبر آپنڑے ذاتی وسائل توں برداشت کریندا پئے ۔ایں بارے قومی خزانے نال کوئی کلیم کائنی کیتے گئے ۔
