اسلام آباد۔31مئی(اے پی پی)وزیر اعظم محمد نواز شریف پاکستان دی سیاست اچ کلھے رہنماء ہن جیڑھے جو آپنڑے سیاسی قد کاٹھ نال قومی رہنماء سمجھیے ویندن،او قیادت دی خوبیاں نال مزین ایجھے رہنماء ہن جنہاں کوں منفرد کردار اتے سیاسی پس منظر دی وجہ توں پاکستان دی عوام دی اکثریت دی حمایت ہئے پئی،او آپنڑی کرشماتی اتے مضبوط شخصیت دی وجہ نال ایجھے لیڈر ہن جنہاں کوں روایتی طور ہک رہنماء آکھیا ونج سگدے۔اے گالھیں منگل کوں الجزیرہ دے ادارتی صفحہ تے لکھے گئے مضمون اچ الجزیرہ اچ سیاسی تجزیہ نگار ٹام حسین دا وزیر اعظم محمد نواز شریف دی شخصیت تے مضمون اچ آکھی۔انہاں بئیا لکھیا جو وزیر اعظم محمد نواز شریف دی مقبولیت ایں وجہ نال وی اے جو او پاکستان دی اکثریت بسانگے قابل بھروسہ ہن ۔وزیر اعظم محمد نواز شریف ‘جنرل پرویز مشرف دے دور حکومت وچال جلا وطنی وچال آپنڑاں ودھ ویلھا سعودی عرب اچ لنگھایا جتھاں انہاں کوں آپنڑی شخصیت نکھارنڑ دا موقع ملیا۔انہاں آکھیا جو ایں ویلھے اگر پاکستان دی قوم آپنڑے رہنماء دی اوپن سرجری دی گالھ تے فکر مند ہن تاں انہاں دی اے فکرمندی بجا اتے درست اے۔پاکستان کوں ایں ویلھے نواز شریف جیہے لیڈر دی لوڑھ اے جڈاں پاکستان دہشت گردی دے خلاف جنگ لڑدا پئے اتے اوندی معیشت مضبوط تھیندی پئی اے۔پاکستان اچ آمریت دے تریجھے دور دے بعد ملک اٹھ سالیں دے انتہائی اوکھے دور اچوں لنگھیے۔2008ء دے بعد جڈاں آمریت دا دور مُکیا اتے اوں ویلھے انتخابات وچال محترمہ بے نظیر بھٹو دی شہادت نال ماحول رنجیدہ تھی گئیا ہئی اتے ملک کوں دہشت گردی دی وڈی قیمت بھرنڑاں پئی۔انہاں آکھیا جو گزریل سال تھیونڑ آلے عوامی سروے اچ نواز شریف دی مقبولیت بلندی رہی۔ہنڑیں ای انہاں دی جماعت بلدیاتی انتخابات اچ وڈی کامیابی حاصل کیتی اے۔مضمون نگار پاکستان تحریک انصاف د ے چیئرمین عمران خان نال موازنہ کریندیں ہوئیں آکھیا جو انہاں کوں وزیر اعظم محمد نواز شریف آلی کار آپنڑے آپ کوں سنجیدہ اتے میچور بنڑاونڑاں پمسی۔عمران خان کوں آپنڑے زبانی جمع خرچ پاروں عوام اچ ودھ مقبولیت حاصل کائنی۔
