اسلام آباد ۔ 26 مئی (اے پی پی) صدر مملکت ممنون حسین پاکستان اتے مالدیپ وچال ڈوطرفہ تعلقات تے اطمینان دا اظہار کریندے ہوئیں مالدیپ کوں سارے شعبیا ں اچ پاکستان دی مسلسل حمایت دا یقین ڈیوایا ہے ۔ انہاں اے گالھ مالدیپ دے وزیر برائے دفاع تے قومی سلامتی آدم شریف عمر نال گالھ مہاڑ کریندے ہوئیں آکھی جنھاں خمیس کوں اتھاں ایوان صدر اچ انہاں نال ملاقات کیتی۔ پاکستان اچ مالدیپ د ے ہائی کمشنر احمد سلیم وی ایں موقعے تے موجود ہن ۔ صدر ممنون حسین آکھے جو ڈوہائیں ملکاں وچال پرانڑیں دوستانہ تعلقات موجود ہن ۔ انہاں ایں گالھ اطمینان دا اظہار کیتا جو ڈوہائیں ملکاں ہمیشہ سارے معاملیاں بارے عالمی فورماں تے ہک بئے دی حمایت کیتی ہے۔ انہاں امید ظاہر کیتی جو ڈوہائیں ملکاں وچال باہمی تعلقات مستقبل اچ بئے مستحکم تھیسن ۔ صدر دفاع دے شعبے اچ ڈوہائیں ملکاں وچال قریبی تعاون تے اطمینان ظاہر کریندے ہوئیں آکھیا جو پاکستان مالدیپ دے اہلکاراں کوں تربیتی سہولتاں ڈیندا پئے ۔ انہاں آکھیا جو پاکستان دفاعی پیداوار دے شعبے اچ بہوں چنگی اگوہیں کیتی ہے ، بہوں سارے ملک پاکستان دے سپر مشاق اتے جے ایف 17 تھنڈر طیارے مُل گھندے پئے ہن ۔ مالدیپ دے دفاع اتے قومی سلامتی دے وزیر آدم شریف عمر مسلسل کثیر الجہتی معاونت ڈیونڑ تے پاکستان دا شکریہ ادا کریندے ہوئیں آکھیا جو ڈوہائیں مسلم بھرا ملکاں وچال گزریل 50 سالیں توں بہوں چنگے تعلقات موجود ہن ۔ وزیر دفاع ایں گالھ تے تعریف کیتی جو پاکستان ہمیشہ غیر مشروط مدد کیتی ہے ۔
