کوٹری ۔ 14 مئی (اے پی پی) صدر مملکت ممنون حسین آکھے جو پاکستان اچ تیز رفتار ترقی کوں ممکن بنڑاونڑ کیتے کرپٹ اتے بدعنوان لوکیں کوں نظام اچوں انج کرنڑاں ہوسی ۔ صدر مملکت اے گالھ کوٹری چیمبر آف ٹریڈ اینڈ انڈسٹری دی تقریب نال خطاب اچ آکھی ۔ ایں موقعے تے سندھ دے وزیر صنعت محمد علی ملکانی اتے بئے وی موجود ہن ۔ صدر مملکت آکھیا جو ستر دی دہائی تئیں قومی ترقی دا سفر اطمینان بخش ہئی ، ایندے بعد بدعنوانی ترقی دی رفتار روک ڈتی ، پاکستان اچ قابل اتے اہل لوکیں دی کئی کمی کائنی جڈانجو کرپشن اتے سفارش دے کلچر کارکردگی کوں متاثر کرڈتے ۔ صدر مملکت آکھیا جو گوادر بندرگاہ ایں سال فعال تھی ویسی اتے اتھاں دنیا دا ساریاں توں جدید ائیر پورٹ بنڑسی ۔ انہاں آکھیا جو کالا باغ ڈیم متنازع تھی گئے تاں ایں ملک اچ پانڑیں ذخیرہ کرنڑ دے منصوبے شروع کائنی کیتے گئے جیندے نال ملک کوں نقصان تھئے ۔ ہنڑ انہاں غلطیاں دا حل کیتا ویندا پئے اتے پانڑیں دے نویں ذخیرے بنڑائے ویندے پئے ہن ۔صدر مملکت آکھیا جو دہشت گردی کوں مکاونڑ سانگے سیاسی عزم دے نال کم کیتا ویندا پئے جیندے مثبت نتیجے سامنڑیں امدے پئے ہن جیندے نال کاروباری اتے صنعتی ماحول چنگا تھیسی ۔ صدر مملکت ممنون حسین آکھیا جو اے حکومت دی بہوں وڈی کامیابی ہے جو صنعت کار اتے تاجر ا من و امان بارے تسلی اچ ہن ، صدر مملکت آکھیا جو بجلی دی پیداوار دے منصوبیاں تے پاک چین اقتصادی راہداری دے تحت کم جاری ہے اتے امید ہے جو سال 2018 تئیں اساں ایں مسئلے تے قابو پاونڑ اچ کامیاب تھی ویسوں ۔
