اسلام آباد ۔ 24 مئی (اے پی پی) صدر مملکت ممنون حسین آکھیا جو پاک چین اقتصادی راہداری مئوثر اتے تکھے علاقائی رابطیاں دے علاوہ چین دا ”ہک خطہ،ہک شاہراہ” دا تریخی تصور دنیا کوں نویں عہد اچ داخل کر ڈیسی،اے ترقی اتے امن و استحکام دا دور ہوسی،چین دنیا اچ ہک وڈے کھلاڑی دی حیثیت نال تعمیری اتے مثبت کردار نبھیندا پئے ،۔صدر مملکت اے گالھ اسلام آباد اچ نیشنل یونیورسٹی آف سائنسز اینڈ ٹیکنالوجی (نسٹ) اتے چین دی پیکنگ یونیورسٹی دے ِ اہتمام نال بیجنگ فورم دے افتتاح دے موقع تے خطاب کریندیں ہوئیں آکھی۔ایں موقع تے وفاقی وزیر برائے سائنس تے ٹیکنالوجی اتے دفاعی پیداوار رانا تنویر حسین، وزیراعظم دے مشیر برائے امورِ خارجہ سر تاج عزیز، چیئرمین پیکنگ یونیورسٹی کونسل پروفیسر زو شان لو، پاکستان اچ چین دے سفیر سن وی ڈونگ، ریکٹر نسٹ انجینئر محمد اصغر، پیکنگ یونیورسٹی دے وائس پریذیڈنٹ ڈاکٹر لی ین سانگ اتے ایڈوائزر نسٹ عامر ہاشمی وی موجود ہن ۔صدر مملکت آکھیا جو پاک چین تعلقات خطہ اچ من تے استحکام اتے ترقی تے خوشحالی دے ضامن ہن ۔انہاں آکھیا جو اے خوشی دا موقع اے جو چین توں باہر بیجنگ فورمم دے پہلے اجلاس سانگے اسلام آباد کوں چنڑیا گئے۔انہاں آکھیا جو اے چین دا پاکستان دی قیادت تے بھروسہ تے اعتماد اے ،ایندے وچ شریک مندوبین کوں ہک ڈوجھے دے خیالات توں فائدہ چاونڑاں چاہیدا اے ۔
