بیجنگ۔ 22 مئی (اے پی پی) چین اچ پاکستان دے سفیر مسعود خالد آکھے جو پاک چین سفارتی تعلقات دی 65ویں سالگرہ ڈوہائیں ملکاں دی مضبوط دوستی کوں ظاہر کریندی ہے ، ڈوہائیں ملکاں وچال باہمی اعتماد اتے عزم دے نال مختلف شعبیاں اچ ڈوطرفہ تعاون کوں ودھارا ڈیندے پئے ہن ۔ ” اے پی پی ” نال خصوصی گالھ مہاڑ کریندے ہوئیں انہاں آکھیا جو ڈوہائیں ملک آپنڑیں سفارتی تعلقات دی 65ویں سالگرہ منیدے پئے ہن جیہڑا جو ڈوہائیںملکاں دے سالیں دے مظبوط گانڈھے کوں ظاہر کریندے ۔ انہاں آکھیا جو معیشت ، تجارت ،دفاع ، دہشتگردی دا مقابلہ ، سائنس اینڈ ٹیکنالوجی ، تعلیم ، ثقافت ، میڈیا سمیت مختلف شعبیاں اچ باہمی تعاون دے فر وغ کیتے جامع حکمت عملی بنڑائی گئی ہے جیہڑی نہ صرف حکومتی سطح تے ہئی نہیں جڈانجو ڈوہائیں ملکاں دے لوک دی ہک بئے دے نال تعاون دے استحکام کیتے بھرپور کم کریندے پئے ہن ۔ انہاں آکھیا جو 1950ء اچ پاکستان پہلا مسلمان ملک ہئی جئیں چین نال سفارتی تعلقات قائم کیتے اتے انہاں اچ ویلے دے نال نال مضبوطی اتے وسعت آندی گئی ۔ ہک سوال دے جواب اچ انہاں آکھیا جو ڈوہائیں ملکاں دے علاقائی اتے عالمی مسلیاں بارے وچار ہکو سنویں ہن ۔ ہک بئے سوال دے جواب اچ انہاں آکھیا جو ڈوہائیں ملک اقوام متحدہ دی سلامتی کونسل اچ اصلاحات دے پروگرام تے وی ہکو طرح دا موقف رکھیندے ہن ۔ پاکستانی سفیر آکھیا جو ایں سال ڈوہائیں ملک کراچی لہور موٹروے دے ملتان ، سکھر سیکشن اتے قراقرم ہائی وے مرحلہ 2کیتے وی معاہدیاں تے دستخط کیتے ہن ایں طرح توانائی دے مختلف شعبیاں تے وی کم جاری ہے جڈانجو چین پاکستان سی پیک منصوبے دے تحت گوادر دی بندرگاہ کوں عالمی معیار دے مطابق بنڑاونڑ اچ مصروف ہن جیندے نال نہ صرف ڈوہائیں ملکاں دی باہمی تجارت اچ ودھار ا تھیسی جڈانجو ایندے نال خطے اچ تجارت وی ودھ ویسی ۔
