بیجنگ ۔ 22 مئی (اے پی پی)فیڈریشن آف پاکستان چیمبرزآف کامرس اینڈ انڈسٹریز ( ایف پی سی سی آئی) دے صدر عبدالرئوف عالم آکھے جو چین پاکستان سمیت ساری دنیا دے ترقی پزیر ملکاں دی چنگائی کیتے کوشاں ہے، غریب ملکاں کوں ترقی ڈیونڑ دا چینی ماڈل مغربی ماڈل توںچنگا ہے کیونجو چینی امداد مشروط کائنی ہوندی ، چین ولوں پاکستان اچ اقتصادی راہداری منصوبہ اتے 46 ارب ڈالر دی سرمایہ کاری نال اساڈے ملک دالیکھ وٹیچ ویسی ۔اے پاکستان دی تریخ دا مقبول ترین منصوبہ ہے جیکوں تکھے توں تکھے پورا کرنڑ کیتے حکومت اتے فوج دیاں کوششاں تعریف دے قابل ہن ۔ انہاں اے گالھ چین دے شہر سیان اچ تھیونڑ آلے سلک روڈ انٹرنیشنل ایکسپو اتے کانفرنس نال خطاب کریندے ہوئیں آکھی ،جیندے اچ ساری دنیا اچوں ہک لکھ توں ودھ کاروباری لوکیں ، سینکڑیاں سفارتکاراں اتے سوا چھی ہزار کمپنیاں شرکت کیتی۔انہاںآکھیا جو چینی قیادت ولوں پاکستان کوں بئے ملکاں تے ترجیح ڈیونڑ ڈوہائیں ملکاں دی پرخلوص اتے لازوال دوستی دا ثبوت ہے جیندے تے اساں انہاں دے شکر گزار ہیں۔ عبدالرئوف عالم آکھیا جو شاہراہ ریشم ڈو ہزار سال توںچین کوں ایشیائ، افریقہ اتے یورپ نال جوڑ تے رکھیا ہویا ہے جیندے نال تجارت دے علاوہ علم تے فن و کلچر دا تبادلہ اتے لوکیں دے ہک بئے دے نیڑے آونڑ دے موقعے ملے ہن ۔ ہنڑ چینی قیادت ولوں ایں کوں جدید طریقے تے بنڑاونڑ دے فیصلے نال ساری دنیا اچ ترقی اتے تجارت دے نویں موقعے سامنڑیں امسن، جیندا ثبوت 2015 اچ چین دی شاہراہ ریشم نال جڑیئے ہوئے ملکاں توں 995 ارب ڈالر توں ودھ دی تجارت ہے۔انہاں آکھیا جو سی پیک بارے پاکستان دے کجھ حلقیاں اتے ہمسائے ملکاں دے خدشات بے بنیاد ہن ۔
