اسلام آباد ۔ 3 جون (اے پی پی) صدر مملکت ممنون حسین آکھیا اے جو دنیا وچ اوہ قوماںسراچا کر تے ٹر سگدیاں ہن جیرھیاں اپنڑی اقدار کوں تکڑ ا پکر گھندیاں ہن اتے اپنڑی قومی شناخت تے کڈاہیں آنچ نی آونڑ ڈیندیاں، ایں سلسلے وچ تریمتاں دی ذمے داریاں ڈوجھیاں کنوں ودھ تے ہن۔ ایہ گالھ انہاں جمعہ کوں وفاقی تعلیمی بورڈ دے 30 ویں جلسہ تقسیم اسناد تے اعزازات نال خطاب کریندے ہوئیںآکھی۔ ایں موقع تے وزیر مملکت برائے تعلیم تے پیشہ ورانہ تربیت انجینئر بلیغ الرحمان اتے بئے لوکاں وی خطاب کیتا۔ صدر مملکت آکھیا جو تعلیم دے نال نال تربیت دی وی برابر دی اہمیت ہے جیکوں تعلیم دالازمی حصہ بنڑا ڈتا ونجے تاں ایندے بہوں چنگے نتیجے بر آمد تھیندن اتے اساڈے با ل مسلے اتے اوکھ توں مایوس تھیونڑ دی بجائے امید دا دامن ہتھوں کڈاہیں نہ چھوڑیسن قوم دی طاقت بنڑ ویسن اتے زمانے کوں سمجھ تے اپنڑے سانگے سدھے رستے دا انتخاب کر سگسن۔ صدر مملکت ایں امر تے مسرت دا اظہار کیتا جو وفاقی تعلیمی بورڈ استاداں دی تربیت اتے انہاں دیاں صلاحیتان وچ ودھارے تے توجہ ڈیندا پئے۔ انہاں آکھیا جو ایندے کیتے ضروری ہے جو تعلیمی بورڈ متعلقہ وزارتاں اتے اداریاں کوں اپنڑے تجربے دے بارے ڈسیندا رہے تاں جو تعلیمی نصاب وچ وی وقت دے بدلدے ہوئے تقاضیاں دے مطابق تبدیلی آندی رہوے۔ انہاں آکھیا جو وزیراعظم نصاب دی تشکیل نو دی جیرھی ذمے داری انہاں دے حوالے کیتی ہے، ایندی ادائیگی سانگے اپنڑیاں ساریاں صلاحیتاںاستعمال اچ گھن آونڑ۔ انہاں آکھیا جو نصاب دی تشکیل نو ایں خاطر وی ضروری ہے جو نویں نسل اپنڑی تریخ اتے مشاہیر نال چنگی طرح واقف تھی سگے۔ صدر مملکت آکھیا جو دنیا وچ او قوماں ترقی کرسگدیاں ہن جیرھیاں سیاسی اتے اقتصادی طور تے مضبوط ہوون، ایں سانگے ضروری ہے جو اساڈے نینگر ایندے سانگے خود کوں تیار رکھن تاں جو زندگی دے مختلف شعبیں وچ قوم کوں غیراں ڈے نہ ڈیکھنڑاں پووے اتے جڈاں ضرورت پووے تاںاساڈے نوجوان اپنڑیاں ذمے داریاں اپنڑے ہتھاں وچ گھن گھنن۔صدر مملکت آکھیا جو حقیقی قومی ترقی سانگے تریمتاں کوں قومی ورک فورس وچ شامل کرنڑ بہوں ضروری ہے، ایں سلسلے وچ اوہ اعلیٰ ترین تعلیم حاصل کرن اتے ایندے دگ اچ کوئی رکاوٹ نہ گھن آون۔ وزیر مملکت برائے تعلیم انجینئر بلیغ الرحمان ایںموقع تے آکھیا جو حکومت تعلیم دے شعبے وچ مسلسل چنگائی گھن تے آندی پئی ہے ایں سلسلے وچ امتحانی نظام کوں بیا زیادہ چنگا کیتا ویندا پئے۔ انہاں آکھیا جو حکومت طالبیں سانگے بئے وظیفے اتے قرض حسنہ دے پروگرام وی شروع کر یندی پئی ہے۔ صدر مملکت اعلیٰ کارکردگی دامظاہرہ کرنڑ آلے طالب علماں وچ سرٹیفکیٹس اتے میڈل وی ونڈیے ۔