امریکا یا کہیں بئے دے سامنڑیں نہیں پاکستان دے لوکیں اتے پارلیمنٹ کوں جوابدہ ہاں، عوام شناختی کارڈ دی تصدیق اچ تعاون کرن ، وزیر داخلہ چوہدری نثارعلی خان

کلر سیداں ۔ 4 جون(اے پی پی) وزیر داخلہ چوہدری نثارعلی خان آکھے جو او امریکا یا کہیں بئے دے سامنڑیں نہیں پاکستان دے عوام اتے پارلیمنٹ کوں جوابدہ ہن ۔ عوام شناختی کارڈ دی تصدیق اچ تعاون کرن، پہلے مرحلے اچ ڈھئی کروڑ خاندان دے سربراہان کوں تصدیق سانگے سنیہا پٹھیا ویسی تانجو انہاںد ے فیملی ٹری اچ کئی بیا بندہ تاں شامل کائنی ، غیرقنونی شناختی کارڈ جاری کرنڑآلے نادرا عملہ تے شناختی کارڈ رکھنڑآلے کوں ڈو مہینے دی مہلت ڈیندے پئے ہئیں ، ایں توں فیدہ نہ چاونڑآلیاںکوں سزاواں ڈیسوں، پارلیمانی نظام اچ وزیراعظم دی جاہ کئی بیا نہیں گھن سگدا، بلاول بھٹو زرداری دے غیر سنجیدہ بیان تے تبصرہ نہیں کرنڑاں چاہندا،چھنڑ چھنر کوں کلر سیداں اچ تحصیل میونسپل کمیٹی دے نو منتخب اراکین دے اعزاز اچ استقبالیے دے موقعے تے میڈیا نال گالھ مہاڑکریندے ہوئیں چوہدری نثارعلی خان آکھیا جو او آپ دے حلقے اچ 4 ارب روپے دے ترقیاتی منصوبیاں کوں شروع کریسن۔ ہک سوال دے جواب اچ انہاں آکھیا جو انہاں دے بارے بلاول دا بیان اے جتنا سنجیدہ کائنی جو ایندے اُتے تبصرہ کیتا ونجے ، ہک سوال دے جواب اچ چوہدری نثار علی خان آکھیا جو نان ایشو کوں وڈا مسئلہ بنڑاونڑ تے افسوس ہے ۔ میں 32 سال توں سیاست اچ ہاں اتے رول آف بزنس جانڑداں ۔ اے بحث بے معنی اتے بلاجواز ہے۔ وزیر داخلہ آکھیا جو پارلیمانی نظام حکومت اچ وزیراعظم دی جاہ کئی بیاں نہیں گھن سگدا، پارلیمانی نظام اچ قائد ایوان ہی وزیراعظم ہوندے اتے ایندی عدم موجودگی اچ کابینہ آپ داکم کریندی ہے ۔ پاکستان دی کابینہ اپنڑاںکم کریندی پئی ہے ۔ انہاں آکھیاجو ہک رپورٹ آئی ہے جیندے اچ حکومتی اقدامات نال دہشتگرداں دے گرد گھیرا تنگ ہونڑ دے حوالے نال ڈسایا گئے ۔ وزارت داخلہ دہشتگردی دے خلاف جنگ اتے آئی ڈی پیز دی بحالی دے امور دی کہیں حد تئیں ذمہ دار ہے۔ انہاں آکھیا جو نیکٹا فعال ہے، ایندے کم کوں بیا چنگاکرنڑ دی لوڑ ہے ۔ فنڈز اتے انسانی وسائل دا مسئلہ درپیش ہے، اساں بہوں حد تئیں مسلیاں کوں حل کیتے ۔ ہک سوال دے جواب اچ انہاں آکھیا جو ہک ارب روپے دی لاگت نال چکلالہ اچ ہک ہسپتال بنڑایا ویندا پئے ۔ 800 کنال زمین قبضہ گروپاں توں چھڑوائی گئی ہے ۔ وزیراعظم دی ہدایات تے ہنڑ اے زمین پنجاب حکومت کو ں ٹھیکے تے ڈتی گئی ہے ۔ انہاں آکھیا جو اے گالھ میں کیتی ہے اتے ہنڑ وی کریساں جو نادرا اچ کہیں وی کرپٹ بندے دی جاہ کائنی ۔ میں وزارت سنبھالنڑ دے بعد ذمہ داری سمجھ تے نادرا تے توجہ ڈتی ہے ۔گزریل دوراں اچ غلط جاری کیتے گئے کارڈ بلاک کرنڑ دا رواج کائناں ہئی ۔ وزیرداخلہ آکھیا جو او رحمن ملک کوں انہاں دی حکومت دے اعدادوشمار بھجوا ڈیندے ہن ۔ غیر قنونی کارڈ بلاک کرنڑ دی ذمہ داری نادرادی ہے۔ اساں آپنڑیں دور اچ ہنڑ تئیں 2 لکھ 50 ہزار شناختی کارڈ اتے 29 ہزار پاسپورٹ بلاک کیتے ہن ۔ وزیر داخلہ آکھیا جو ملا منصور کوں کارڈ دا اجراء 2001-02 اتے ایندی تجدید گزریل حکومت دے دور اچ تھئی ۔اساں کہیں تے الزام نہیں لیندے ۔