ایوان بالا اچ 22واں ترمیمی بل اتفاق رائے نال منظور

اسلام آباد ۔ 2 جون (اے پی پی) ایوان بالا ‘ 22ویں ترمیمی بل دی اتفاق رائے نال منظوری ڈے ڈتی اے۔بل دے حق اچ 71ارکان ووٹ ڈتا جڈانجو مخالفت اچ کوئی ووٹ نی آیا۔ایں توں پہلے خمیس کوں ایوان بالا دے اجلاس اچ وفاقی وزیر قانون تے انصاف زاہد حامد تحریک پیش کیتی جو اسلامی جمہوریہ پاکستان دے دستور اچ بئی ترمیم کرنڑ دا بل دستور22واں ترمیمی بل 2016ء قومی اسمبلی توں منظورہ کردہ صورت تے غور کیتا ونجے۔سینیٹ دے ارکان آئینی ترمیم تے اعتراضات کریندیں ہوئیں آکھیا جو ایندے الفاظ تے اساں کوں تحفظات ہن ۔سینیٹ اچ قائد ایوان اعتزاز احسن 22ویں آئینی ترمیم تے اعتراض کریندیں ہوئیں آکھیا جو ساکوں ایں ترمیم دی زبان تے اعتراض اے جتھاں بی پی ایس 22دا ذکر اے او اتھاں نہ آونڑاں چاہیدا ہئی ۔ایںدے علاوہ بل اچ عمر دی ودھ توں ودھ حد68سال مقرر کیتی گئی اے جو اساڈے نیڑے بہوں ودھ اے جڈانجو ساںکوں اے وی اندازہ اے جو ڈاہ جون توں پہلے ایندی منظوری لازمی اے ایں سانگے اساں چاہندوں جو حکومت یقین ڈواوے جو ایجھی گندی ڈرافٹنگ کائنا کیتی ویسی۔سینیٹر اعظم سواتی آکھیا جو ایں بل دے ذریعے حکومت کوں سہولت ڈتی ویندی پئی اے۔سینیٹر بابر اعوان آکھیا جو حکومت کوں اے بل پہلے گھن آونڑاں چاہیدا ہئی ۔۔ سینیٹر کرنل (ر) سید طاہر حسین مشہدی آکھیا جو ایوان بالا اچ وی ایں بل تے گالھ تھیونڑی چاہیدی اے ۔سینیٹر سعید غنی آکھیا جو بل دی ڈرافٹنگ اچ بہوں چیزاں کوں درست کرنڑ دی لوڑھ اے۔سینیٹر شاہی سید آکھیا جو بل دی حمایت نی کریندا اتے ایوان توں واک آئوٹ کریندا اتے او واک آئوٹ کر گئے ۔سینیٹر تاج حیدر آکھیا جو آرٹیکل 254رستہ بنڑیندے۔وزیر خزانہ اسحاق ڈار آکھیا جو انتخابی اصلاحات کمیٹی اچ 30اچوں ڈاہ ارکان سینیٹ دے ہن ۔18ویں ترمیم اچ اساں تحمل نال کم گھدا۔اساں وی اعتراضات ڈتے۔17مئی کوں انتخابی اصلاحات کمیٹی آپنڑی رپورٹ ڈے ڈتی ہئی۔کمیٹی دے 18اتے56اجلاس ذیلی کمیٹی دے تھین ۔کمیٹی اچ ساری جماعتاں دی نمائندگی ہئی ۔چار بل جنہاں اچ سینیٹ ترمیم کیتی او میںقومی اسمبلی توں ولا منظور کروائے ۔ حکومت چاہندی تاں سانجھا اجلاس سڈ سگدی ہئی ۔اساں ایوان بالا دا احترام کیتا۔میں وی ڈو گھنٹے تقریر کر سگداں پر موضوع تے رہساں۔بل اچ چیف الیکشن کمشنر اتے ممبرز دی اہلیت دا تعین اتفاق رائے نال کیتا گئے ۔اساں بہوں محنت نال کم کیتے ۔22ویں ترمیم اساں نی کیتی اے ساریاں دے مشورے اتے خواہش نال آئی اے۔ وزیر قانون زاہد حامد آکھیا جو کمیٹی دے 34ارکان اچ ساریاں جماعتاں دی نمائندگی ہئی اتے وڈا اتفاق یا۔سینیٹر اعتزاز احسن آکھیا جو سینٹ ربڑ سٹمپ کائنی ۔ایندے بعد چیئرمین بل تے رائے شماری کروائی۔ارکان آپنڑی جاہ تے کھڑ تے بل دی حمایت اتے مخالفت اچ آپنڑی رائے ڈتی۔بل دی حمایت اچ 72اتے مخالفت اچ کوئی ووٹ نی آیا۔اتے کل ارکان دی ڈو تہائی اکثریت نال اے بل منظور تھی گئیا۔