اسلام آباد ۔15 جون(اے پی پی) وفاقی وزیر تجارت خرم دستگیر خان آکھیا ہے جو عالمی سطح تے قیمتاں اچ گھٹکی دی وجہ توں پاکستان دی ٹیکسٹائل بر آمدات اچ گھٹکی تھی ہے ،آندے مالی سال دے بجٹ اچ برآمدات اچ ودھارے سانگے اقدامات تجویز کیتے گے ہن،یکم جولائی توں پنج بر آمدی شعبیں تے سیلر ٹیکس ختم کر ڈتا ویسی ،31اگست تئیں سارے ٹیکس ریفنڈ ادا کیتے ویسن ۔معیاری بج دی فراہمی سانگے قنون وختی پارلیمنٹ اچ آویسی ۔بدھ کوں ایوان بالا دے اجلاس اچ سینیٹر عقیق شیخ دے توجہ ڈیوائو نوٹس دے جواب اچ وفاقی وزیر آکھیا جو ٹیکسٹائل دا شعبہ بہوں وسیع ہے ۔پہلے ڈاہ مہینے اچ ایندی بر آمدات اچ 7.72فیصد گھٹکی تھی ہے ،اے گھٹکی ویلیو چین دے پہلے ڈو شعبے اچ گھٹکی دی وجہ توں تھی ہے ،انہاں اچ کپاہ دے دھاگہ شامل ہے ،موسمی حالات اتے ویلھے تے بارشاں نہ تھیونڑ پاروں کپاہ دی پیدوار اچ گھٹکی تھی ۔اجوکے سال اساکوں کپاہ دی درآمد وی کرنڑی پی ،انہاں آکھیا جو اے فکر کرنڑ دا ویلھا ہے انہاں آکھیا جو سپننگ انڈسٹری اچ جدت کائنی آئی ایں وجہ توں بحران ہے انہاں آکھیا جو پوری دنیا اچ کپاہ دی پیداوار اچ گھٹکی نظر امدی پی ہے ایندی قیمت وی گھٹ تھی ہے انہاں آکھیا جو پنج بر آمدی شعبیں کوں یکم جولائی توں زیرو ریٹ کر ڈتا ویسی ۔انہاں اچ ٹیکسٹائل ،چمڑے اتے سرجیکل آلات دے شعبے شامل ہن انہاں آکھیا جو 31اگست تئیں ٹیکس ریفنڈ کر ڈتے ویسن ۔عالمی سطح تے قیمتاں اچ گھٹکی دی وجہ توں آمدنی گھٹ ہے لیکن قیمتاں چنگیاں تھیونڑ نال پاکستان کوں فائدہ تھیسی ۔
