اسلام آباد ۔ 23 جون (اے پی پی) وفاقی وزیر اطلاعات، نشریات تے قومی ورثہ سینیٹر پرویز رشیدآکھیا جو عمران خان عوام توں ووٹ نی گھن سگدے ایں سانگے احتجاج دی دھمکیاں ڈیندن،2018ء دے انتخابات توں ڈرے ہوئے دھرنیاں دی گالھیں کریندن،عمران خان دے اکساونڑ تے پہلے وی کہیں عمل کائنی کیتا،سول نافرمانی کوں عوام ر د کر ڈتا،احتجاج اتے دھرنیاں نال پہلے کوئی شہر بند تھیا نہ ہنڑ تھیسی،احتساب دا مطالبہ کرنڑ آلیاں دی آپنڑی آف شور کمپنیاں ہن ،انہاں 2002ء اچ کالے دھن کوں چِٹا کیتا،نواز شریف دا ناں پانامہ پیپرز اچ کائنی ،ہک پاسے خان صاحب بلاول کوں آپنڑے کنٹینر تے سڈیندن اتے ڈوجھے پاسوں انہاں دی والدہ کوں شہید کرنڑ آلیاں کوں 30کروڑ روپے ڈے ڈیندن،بلاول ایں گالھ کوں سمجھن جو عمران خان انہاں دے نال ہن یا محترمہ دے قاتلاں دے نال،میڈیا تھیلیسیمیا دے مرض توں آگاہی تدارک دی اختیاطی تدابیر کوں عام کرے۔اے گالھ انہاں خمیس کوں پمز ہسپتال اچ تھیلیسیمیا دے مریض بالاں دے اعزاز اچ تھیونڑ آلی تقریب نال خطاب کریندیں ہوئیں آکھی۔انہاں آکھیا جو پمز ہسپتال دی انتظامیہ اتے وائس چانسلرز دی صلاحیتاں،انہاں د ی محنت اتے لگن کوں خراج تحسین پیش کرنڑاں چاہیداے اے جو8لکھ دی آبادی سانگے بنڑی سہولت کوں20لکھ توں ودھ آبادی دی لوڑھ اتے بئے شہراں اتے صوبیاں توں آونڑ آلیاں دی لوڑھ کوں پورا کریندے پئن ۔انہاں آکھیا جو 18ویں ترمیم دے بعد صوبیاں کوں صحت دا شعبہ منتقل تھی گئے اتے فنڈز وی منتقل کر ڈتے ویندن جڈانجو ایں دے باوجود آزاد کشمیر، گلگت بلتستان اتے ملک دے چاریں صوبیاں توں لوک علاج سانگے اتھاں امدن اتے پمز انتظامیہ ڈاکٹر اتے پیرامیڈیکل سٹاف اے ودھیکی بوجھ وی برداشت کریندے پئن ۔اساں ساریاں کوں انہاں دی تعریف کرنڑی چاہیدی اے۔ ہک سوال دے جواب اچ انہاں آکھیا جو امجد صابری نہ صرف پاکستان بلکہ پوری دنیا اچ امن دے سفیر دے طور پہچانڑیے ویندے ہن ۔انہاں سر اتے تال نال خدا اتے اوندی مخلوق دا محبت دا سنھیا عام کیتا اتے موسیقی کوں نیک مقصد سانگے استعمال کیتا اتے لوکاں کوں تقسیم اتے تفریق کرنڑ سانگے استعمال نی کیتا۔ہک سوال دے جواب اچ انہاں آکھیا جو پاکستان دی قومی سلامتی دے اداریاں دے نینگراں ،سپاہیاں اتے افسراں قربانیاں ڈے کراہیں ملک اچ اتے کراچی اچ امن قائم کیتا اتے کراچی اچ رہنڑ آلے تسلیم کریندن جو اج کراچی اچ پہلے توں ودھ امن اے جڈانجو کجھ گنتری دے لوک ہن جیڑھی ایجھی بزدلانہ کاروائیاں کریندن انہاں دا وی جلدی صفایا کر ڈتا ویسی۔
