اسلام آباد۔ 6 جون(اے پی پی) مسلم لیگ(ن) آزاد کشمیر انتخابی منشور کوں عملی جامہ پاونڑ سانگے وفاقی حکومت ولوں آزاد کشمیر سانگے ترقیاتی ایجنڈے دا اعلان کر ڈتا،50ارب روپے سڑکاں اتے انفراسٹرکچر دی بحالی سانگے آندے پنج سالیں اچ خرچ کیتے ویسن،ہر ضلع اچ ڈسٹرکٹ ہیڈ کوارٹرز ہسپتال بنڑائے ویسن اتے جتھاں ہسپتال پہلے توں ہوسن انہاں کوں اپ گریڈ کیتا ویسی،منگلا ڈیم دے متاثرین سانگے پارلیمانی کمیٹی بنڑائی ویسی،میر پور شہر اتے نیڑے دے علاویاں سانگے سوئی گیس دی فراہمی یقینی بنڑائی ویسی،ضلع سدہنوتی اچ جدید یونیورسٹی اتے ضلع بھمبر اچ زرعی یونیورسٹی دا قیام عمل اچ آندا ویسی،آزاد کشمیر دے جنوبی اضلاع کوں مظفر آباد نال ملاونڑ سانگے مظفر آباد میر پور منگلا ایکسپریس وے دی تعمیر جلدی پوری کیتی ویسی،وفاقی حکومت آزاد کشمیر سانگے 5ایئر ایمبولینس ہیلی کاپٹر ڈیسی۔آزاد کشمیر اچ ایں سال ستمبر تئیں تھری جی اتے فور جی سروس کم شروع کر ڈیسی ،لوڈشیڈنگ تے 2018ء تئیں قابو پا گھدا ویسی۔ اے گالھیں وفاقی وزیر امور کشمیر چوہدری محمد برجیس طاہر اتے وفاقی وزیر اطلاعات تے نشریات سینیٹر پرویز رشید دا وزیراعظم دے معاون خصوصی برائے سیاسی امور ڈاکٹر آصف کرمانی رلے کشمیر ہائوس اچ پریس کانفرنس نال خطاب کریندیں ہوئیں آکھی۔
