اسلام آباد ۔ 7 جون (اے پی پی) وزارت داخلہ دے سپیشل سیکریٹری شعیب صدیقی آکھیا اے جو پاکستان امن و امان دے فروغ سانگے منی لانڈرنگ، منظم جرائم، انسانی سمگلنگ اتے سرحد پار مداخلت روکنڑسانگے متعدد اقدامات کیتے ہن۔ نیویارک توں موصول تھیونڑ آلی ہک پریس ریلیز دے مطابق اقوام متحدہ دی پولیس توں متعلق موجودہ اتے مستقبل دے رجحانات بارے وچ اقوام متحدہ دے پولیس سربراہان دے اجلاس نال خطاب کریندے ہوئیں انہاں آکھیا جو پاکستان اقوام متحدہ دی پولیس دے واضح مینڈیٹ تے زور ڈیندا ہے جیندے تے کامیابی نال عمل درآمد تھیونڑ چاہیدے۔ انہاں آکھیا جو وزارت داخلہ مطلوبہ اہداف دے حصول سانگے ذاتی نگرانی اتے قائدانہ کوششاںکر یندی پئی ہے۔ انہاں آکھیا جو انہاںساریاں کوششاں دا مقصد پاکستان بالخصوص اتے دنیا کو ںبالعموم ہک محفوظ جاہ بنڑاونڑ ہے۔ انہاں آکھیا جو پاکستان مشکل حالات نال نبڑن دا گرانقدر تجربہ رکھیندا ہے۔ اساڈے اہلکاراں موثر امن برقرار رکھنڑ دے اقدامات دے ذریعے امن دے دشمناں کوں ناکام بنڑایا، قنون دی حکمرانی، ادارہ جاتی استعداد کار وچ ودھارا ، تخفیف اسلحہ اتے باغیاں کوں ہرا تے دنیا دے مختلف ملکاں کوںقیام امن وچ مدد ڈتی۔ علاوہ ازیں سماجی خدمات سرانجام ڈیندے ہوئیں بنیادی ڈھانچے دی تعمیر اتے منصوبیں دی وختی تکمیل کو ںیقینی بنڑایا گیا ۔ انہاں آکھیا جو پاکستان قومی اتے بین الاقوامی امن دے فروغ سانگے پرعزم ہے اتے عالمی نصب العین سانگے پاکستان عظیم کوششاں اتے قربانیاں ڈتیاں۔ انہاں آکھیا جو امن برقرار رکھنڑ دے مشنز وچ اساں پاکستان سانگے ہور چنگے فعال اتے نمایاں کردار کیتے پرامید ہسے۔
