اسلام آباد ۔ 3 جون(اے پی پی) وزیر خزانہ سینیٹر اسحاق ڈار آندے مالی سال سانگے تقریباً43کھرب95ارب روپے دا وفاقی بجٹ پیش کر ڈتا۔جئیں اچ عوام دی سہولت سانگے کئی اقدامات ،ترقیاتی ایجنڈے ،بہتر مالیاتی نظم و ضبط دے ذریعے خسارہ کوں گھٹ کرنڑ،معاشی استحکام کوں ودھاونڑ تے خصوصی توجہ رکھی گئی اے،بجٹ اچ معیشت دے مختلف شعبیاں خصوصی طور زراعت دی ترقی سانگے کئی اقدامات دا اعلان،سرکاری ملازماں،پنشنرز اتے ورکراں سانگے2013ء اتے 2014ء دے عارضی ودھارے کوں بنیادی تنخواہ دا حصہ بنڑایا ویندا پئے ،وفاقی حکومت دے سارے ملازماں کوں پہلی جولائی2016ء توں ایں مالی سالی دی بنیادی تنخواہ تے 10فیصد ایڈہاک ریلیف الائونس ڈتا ویسی۔وزیر خزانہ اسحاق ڈار جمعہ دی شام ایوان زیریں اچ آندے مالی سال دا قومی بجٹ پیش کریندیں ہوئیں آکھیا جو اج او ایں حکومت داچوتھا بجٹ ایوان اچ پیش کریندے پئن تاں انہاں وزیر اعظم پاکستان اتے قائد ایوان آپنڑی کامیاب اوپن ہارٹ سرجری دے بعد صحت یاب تھیندے پئن ۔ایںایوان ،پوری قوم اتے پوری دنیا دے کروڑاں لوکاں دی دعاواں انہاں دے نال ہن جو او جلدی صحت یاب تھیون اتے وطن عزیز واپس آ کراہیں آپنڑی قیادت دی ذمہ واریاں سنبھالن ۔وزیر خزانہ آکھیا جو جڈاں اساں جون 2013ء اچ درپیش معاشی چیلنجز کوں یاد کریندے ہیسے تاں اتے گزریل ترائے سالیں اچ اساں وزیر اعظم محمد نواز شریف دی قیادت اچ جیڑھا سفر کیتے اوں کوں ڈیکھدیں ہوئیں اللہ دی رحمتاں دا بے حد شکر ادا کریندے ہیسے جو اللہ سئیں اساڈے اتے رحم کیتے۔الحمدللہ معیشت کوں درپیش خطرے ٹل چکین اتے ملک استحکام اتے ترقی آلے پاسے ٹر پئے ۔پاکستان دے جون 2014ء تئیں دیوالیہ ہوونڑ دی پیشین گوئیاں کرنڑ آلے ناکام تھی گئن اتے اساں ملک کوں نہ صرف دیوالیہ تھیونڑ توں بچائے جڈاں جو معیشت کوں اتنا مستحکم کیتے جو اج ابین الاقوامی ادارے پاکستان دا ناں عزت اتے وقار نال گھندن۔انہاں آکھیا آندے مالی سال سانگے محاصل دی وصولی دا تخمینہ 49گھرب 15ارب روپے لاتا گئے جیڑھا جو ایں مالی سال دے مقابلہ اچ 3.5فیصد ودھارے دا حامل اے ،ایں مالی سال محاصل دی وصولی دا تخمینہ 43کھرب 32ارب روپے ہا۔وزیر خزانہ خصوصی طور زراعت دے شعبہ دی ترقی سانگے خصوصی اقدامات دا ذکر کریندیں ہوئیں آکھیا جو اج زرعی شعبہ سانگے ہک تریخی ڈینھ اے کیونجو بجٹ اچ کاشتکاراں کوں سہولت اتے مراعات ڈتیاں گئن ۔وزیر خزانہ آکھیا جو حکومت ٹیکساں دی وصولی دا نمایاں ہدف مقرر کیتے جیڑھا جو ترقیاتی خرچیاں ودھاونڑ سانگے ضروری اے۔انہاں آکھیا جو مالی سال2016-17ء سانگے وفاقی حکومت دے مجموعی محصولات دا تخمینہ 4915.5ارب روپے لاتا گئے جیڑھا جو 2015-16ء دے 13.5فیصد گھٹ اے۔اساں ٹیکس وصولی سانگے ہک وڈا ہدف رکھیے کیونجو معاشی ترقی سانگے ضروری سمجھیے ونجنڑ آلے ترقیاتی خرچیاںاچ ودھارا ٹیکس وصولے دے بغیر ممکن اے۔وزیر خزانہ آکھیا جو صوبائی حکومتاں دا انہاں دا ٹیکساں اچ حصہ ودھارے دے نال2136ارب روپے اے جیڑھا جو گزریل سال دے نظر ثانی شدہ 1852ارب روپے دے مقابلے اچ 15.3فیصد رہیا۔جڈانجو وفاقی حکومت کنے باقی ماندہ وسائل 2780ارب روپے رہ ویسن جیڑھے جو گزریل سالے دے 2481ارب روپے توں12.1فیصد رہیے۔انہاں آکھیا جو وفاقی حکومت کوں ایں گالھ دا ادارک اے جو نویں انتظامات دے تحت صوبائی حکومتاں دی سماجی شعبے اچ خدمات دی فراہمی دی ذمہ واری ودھ گئی اے۔ایں سانگے صوبائی حکومتاں کوں پاکستان دے لوکاںسانگے سماجی خدمت اتے امن و امان دی ذمہ وار ی بہتر طور ادا کرنڑ دے قابل بنڑاونڑ سانگے صوبییاں کوں ڈتی ونجنْ آلے رقوم اچ مسلسل ودھار ا کرندا پئے ۔وزیر خزانہ آکھیا جو بجٹ اچ مالی سالی2016-17ء دے کل خرچے 4395ارب روپے رکھیے گئے ہن جیڑھے جو 2015-16دے نظر ثانی شدہ تخمینہ جات4096ارب روپے توں صرف7.3فیصد گھٹ ہن ۔محصولات اچ بتدریج ودھارے اتے خرچیاں دی گھٹ نال اساڈی معیشت مستحکم تھی اے۔انہاں آکھیا جو2015-16ء دے3400ارب روپے دے مقابلے اچ2016-17ء دے جاری خرچیاں دا تخمینہ3282ارب روپے اے۔انہاں آکھیا جو اساں دفاعی لوڑھ کوں پورا کرنڑ کوں ڈیکھدیں ہوئیں افواج پاکستان دے دفاعی بجٹ سانگے 2015-16ء دے 776روپے دے مقابلے اچ860ارب روپے مختص کیتے جیڑھے جو 11فیصد دا ودھارا اے۔انہاں آکھیا جو ہک ترقی پزیر معیشت دی سرمایہ اکری دی لوڑھ کوں پورا کرنڑ سانگے ترقیاتی بجٹ سانگے مناسب رقوم رکھی گئی ہن ۔2015-16ء دے نظرثانی شدہ661ارب روپے دے مقابلے اچ 2016-17اچ پبلک سیکٹر ڈویلپمنٹ پروگرام سانگے800ارب روپے رکھیے گئن ۔جیڑھا جو21فیصد ودھارا اے۔ایندے اچ سکیورٹی ودھاونڑ سانگے خصوصی ترقیاتی پروگرام اتے ٹی پی پیز دی واپسی اتے بحالی سانگے رقوم وی رکھی گئی ہن ۔وزیر خزانہ آکھیا جو سرکاری ملازماں ،پنشنراں اتے ورکراں سانگے ریلیف دے اقدامات دا اعلان کریندیں ہوئیں آکھیا جو2013ء اتے2014دے عارضی ودھارے کوں بنیاد تخواہ دا حصہ بنڑایا ویندا پئے ۔انہاں آکھیا جووفاقی حکومت دے سارے ملازماں کوں پہلی جولائی 2016ء توں ایں بنیادی تنخواہ دا 10فیصد ایڈہاک ریلیف الائونس ڈتا ویسی۔انہاں آکھیا جو سول آرمڈ فورس دے سرھدی علاقیاں اچ تعینات بندیاں سانگے خصوصی علاقہ تلافی الائونس جیڑھا جو50-210روپے ماہانہ ہا ودھا کراہیں 300ماہانہ کیتا ویندا پئے ۔
