لاہور۔13 جون(اے پی پی )وزیر خزانہ ڈاکٹر عائشہ غوث پاشاپنجاب مالی سال2016-17ء سانگے16کھرب 81ارب روپے دامتوازن بجٹ پیش کر ڈتا۔جنرل وصولیاں دی مد اچ1319ارب روپے دا تخمینہ،این ایف سی ایوارڈ دے تحت وفاقی محاصل توں1039ارب روپے ملسن،صوبائی ریونیو اچ 280ارب روپے دی آمدنڑ متوقع ،ٹیکساں دی مد اچ 184ارب 40کروڑ روپے اتے نان ٹیکس ریونیو دی مداچ95ارب61کروڑ روپے ملسن،سالانہ ترقیاتی پروگرام دا حجم 550ارب روپے ،جاری خرچیاں دا تخمینہ 849ارب 94کروڑ روپے،تعلیم،صحت،زراعت،صاف پانڑی دی فراہمی اتے امن عامہ دے شعبیاں سانگے804ارب دی وڈی رقم رکھنڑ دا فیصلہ کیتا گئے،سرکاری ملازماں دی تنخواہواں اتے پنشن اچ 10فیصد ودھارے دا اعلان کیتا گئے۔صوبائی وزیر خزانہ سونوار دے ڈینھ بجٹ تقریر وچال ڈسایا جو تعلیم دے شعبہ سانگے کل312ارب80کروڑ روپے رکھیے گئن جنہاں اچ سکول ایجوکیشن دے شعبے سانگے کل256ارب روپے رکھیے گئن جڈانجو پنجاب ایجوکیشن فائونڈیشن سانگے12ارب روپے رکھیے گئن ۔ہائر ایجوکیشن دے شعبہ سانگے 46ارب86کروڑ روپے رکھنڑ دی تجویز اے4ارب روپے دی لاگت نال صوبے دے4لکھ ذہین طلباء اچ لیپ ٹاپ ونڈیے ویسن۔صحت دے شعبے سانگے207ارب30کروڑ روپے رکھنڑ دی تجویز اے ،انہاں ڈسایا جو زراعت’ آبپاشی’لائیوسٹاک’جنگلات’ماہی پروری اتے خوراک تے محیط زرعی معیشت سانگے گزریل مالی سال دی نسبت47فیصد توں ودھ بجٹ مختص کیتا گئے۔صاف پانڑی سانگے رکھیا گئیا بجٹ گزریل سال دی نسبت88فیصد ودھ اے۔انہاں آکھیا جو زراعت دی بہتری اتے کساناں دی خوشحالی سانگے100ارب روپے دے کسان پیکیج دا علان کیتا ویندا پئے،اے پیکیج ڈو سالیں تے محیط اے جئیں سانگے50ارب روپے رکھنڑ دی تجویز اے،زراعت دے شعبے سانگے52ارب30کروڑ روپے رکھیے گئن ،بپاشی’لائیوسٹاک’جنگلات’ماہی پروری تے خوراک سانگے 147ارب روپے رکھنڑ دی تجویز اے جئیں اچ یوریا کھاد دے نرخاں اچ فی بوری400روپے جڈانجو ڈی اے پی کھاد دے نرخاں اچ فی بوری 300روپے گھٹکی دا اعلان کیتا گئے جئیں سانگے11ارب60کروڑ روپے دی رقم رکھی گئی اے۔خادم پنجاب رورل روڈز پروگرام دے منصوبے سانگے27ارب روپے دی رقم رکھی ویندی پئی اے۔ ،انفراسٹرکچر دے شعبہ دے ترقیاتی پروگرام سانگے 130ارب28کروڑ روپے دی رقم رکھی ویندی پئی اے اتے چھوٹے شہراں اچ تعمیر تھیونڑ آلے پل شامل ہن ،انہاں آکھیا جو آندے مالی سال دے بجٹ اچ جنوبی پنجاب دے مختلف علاقیاں اچ جاری اتے نویں ترقیاتی پروگراماں سانگے173ارب روپے دی وڈی رقم رکھی گئی اے ،لیپ ٹاپ ونڈنڑ اچ جنوبی پنجاب دے طلباء تے طالبات کوں50فیصد کوٹہ ڈتا گئے جیڑھا جو آبادی دے تناسب توں18فیصد ودھ اے۔ آندے مالی سال دے ترقیاتی بجٹ اچ یوتھ افیئرز سانگے کل23ارب30کروڑروپے دی رقم رکھی ویندی پئی اے ،صوبائی وزیر خزانہ ڈسایا جو وزیراعلیٰ کود روزگار سکیم دی افادیت دے پیش نظر آندے مالی سال اچ ایں سکیم سانگے3ارب روپے ڈتے ویندے پئن ،مزدور دی گھٹ توں گھٹ تنخواہ 14ہزار روپے مقرر کرنڑ دا اعلان کیتا گئے ۔
