اسلام آباد ۔ 27 جون (اے پی پی) وزیراعظم دے مشیر برائے خارجہ امور سرتاج عزیز آکھیا جو پاکستان خطے اچ بدلدے ہوئے جغرافیائی تے تذویراتی حالات اچ آپنڑے قومی فائدے دے ودھارے اتے تحفظ سانگے فعال خارجہ پالیسی تے عمل کریندا پئے ،افغانستان اچ امن دا عمل ڈیڈلاک دا شکار اے اتے اونکوں ولا شروع کرنڑ اچ ویلھا لگ سگدے،پاکستان افغانستان اچ پائیدار امن دے قیام سانگے مذاکراتی عمل اچ سہولت سانگے تیار اے،پاکستان کشمیر تے آپنڑ ے اصولی مئوقف توں پچھوں کائنا ہٹسی۔انہاں اے گالھ سوموار کوں مدیران اتے اینکر پر سنز کوں خارجہ پالیسی دے سارے پہلواں اتے ہمسایہ تے بئے ملکاں بارے تعلقات بارے ابھردے ہوئے چیلنجاں دے تناظر اچ پاکستان دی حکمت عملی بارے تفصیلی بریفنگ ڈیندین ہوئیں آکھی۔ وفاقی وزیر اطلاعات و نشریات اتے ثقافتی ورثہ سینیٹر پرویز رشید، وزیراعظم دے معاون خصوصی برائے خارجہ امور طارق فاطمی اتے خارجہ سیکرٹری اعزاز احمد چوہدری وی انہاں دے رلے ہن ۔سرتاج عزیز،افغانستان،بھارت ،امریکہ،چین ،سعودی عرب،ایران ،خلیجی تعاون کونسل نال پاکستان دے تعلقات تے تفصیلی روشنی پیندیں ہوئیں اہم قومی مفادات دی پیروی کریندین ہوئیں خارجہ تعلقات دے ودھارے اچ حکومت دی کامیاب پالیسیاں بارے ڈسایا۔سرتاج عزیز آکھیا جو افغانستان اچ امن دا عمل ڈیڈلاک دا شکار اے اتے اینکوں ولا شروع کرنڑ اچ ویلھا لگ سگدے۔سرتاج عزیز آکھیا جو پاکستان دا طالبان تے کجھ اثرورسوخ رہیے جڈانجو آپریشن ضرب عضب شروع تھیا تاں زیادہ تر طالبان افغانستان منتقل تھی گئے اتے انہاں دی لڑائی دی زیادہ صلاحیت افغانستان دے اندر اے۔انہاں آکھیا جو اے گالھ نی آکھی ونج سگدی جو مذاکرات کڈاں شروع تھیسن جڈانجو پاکستان ایں مقصد سانگے کوششا ں جاری رکھیسی۔افغانستان نال طورخم بارڈر دی سرحد تے فائرنگ دے واقعہ بارے ہک سوال دے جواب اچ انہاں آکھیا جو پاکستان آپنڑی سرحد دے اندر گیٹ لاونڑ دا حق رکھیندے اتے کہیں کوں پہلی جون 2016ء توں کارآمد دستاویزات دے بغیرپاکستان اچ وڑنڑ دی موکل کائنی ڈتی ویندی پئی ۔
