پاک فضائیہ دہشتگردی اتے انتہاپسندی دے خلاف جنگ اچ قابل تعریف کردارادا کریندی پئی ہے، صدر مملکت ممنون حسین دی پاک فضائیہ دے سربراہ ائرچیف مارشل سہیل امان نال گالھ مہاڑ

اسلام آباد ۔ 16 جون(اے پی پی) صدر مملکت ممنون حسین آکھے جو پاکستان فضائیہ دہشتگردی اتے انتہاپسندی دے خلاف جنگ اچ قابل تعریف کردار ادا کریندی پئی ہے ۔ اے گالھ صدر مملکت پاک فضائیہ دے سربراہ ائرچیف مارشل سہیل امان نال گالھ مہاڑ کریندے ہوئیں آکھی،جنہاں ایوان صدر اچ صدرمملکت نال ملاقات کیتی۔ صدر مملکت آکھیا جو پاک فضائیہ ریاست دے دشمناں دے ناپاک عزائم کوں مٹی اچ ملا ڈتے ۔ انہاں آکھیا جو پاک فضائیہ فضائی حدوددی حفاظت سانگے بہوں چنگا طریقہ کار بنڑایا ہے ۔ صدر مملکت پاک فضائیہ دے اعلیٰ معیار اتے کارکردگی دی وی تعریف کیتی۔ ملاقات اچ ائرچیف مارشل سہیل امان پاک فضائیہ دے مختلف پیشہ وارانہ امور بارے صدر مملکت کوں ڈسایا۔