اسلام آباد ۔ 9 جون(اے پی پی)مشیر خارجہ سرتاج عزیز آکھیا جو چین نال سٹریٹجک پارٹنرشپ دا قیام اجوکی حکومت ولوں ساریاں توں وڈی کامیابی اے،جڈاں تئیں کشمیر دا مسئلہ حل نی تھیندا،بھارت نال تعلقات اگوں نی ودھ سگدے،بھارت نال سارے تصفیہ طلب مسئلے گالھ مہاڑ نال حل کرنڑ سانگے ہیسے،بھارت نال پٹھان کوٹ واقعے کوں بہانہ بنڑا کراہیں مذاکرات معطل کیتے،مسئلہ کشمیر کوں دنیا دے ہر فورم تے چیسوں،بھارتی دفاعی خرچیاں تے تشویش اے۔ملکی سلامتی اتے دفاعی لوڑھ سانگے گھٹ توں گھٹ دفاعی صلاحیت برقرار رکھیسوں،دفاع دے شعبے اچ خود کفالت اتے دفاعی پیداوار دی برآمدات ودھیسوں ،طالبان کوں مذاکرات دی میز تے گھن آونڑ سانگے چار فریقی رابطہ گروپ دی کوششاں جاری ہن ،ڈرون حملے نال اساڈی ملکی خود مختاری دی خلاف ورزی تھی اتے افغانستان اچ امن کوششاں کوں ضیان پجے۔خمیس کوں دفتر خارجہ اچ پریس کانفرنس وچال اجوکی حکومت دی ترائے سالہ خارجہ پالیسی دا جائزہ گھندیں ہوئیں سرتاج عزیز آکھیا جو اساڈی خارجہ پالیسی پڑوسیاں سمیت سارے ملکاں نال تجارتی اتے اقتصادی تعلقات اچ ودھارے تے استوار اے۔۔چین نال سٹریٹجک پارٹنر شپ اجوکی حکومت دی اہم کامیابی اے،ڈوہاں ملکاں47ارب ڈالر سی پیک دے معاہدیاں تے دستخط کیتن۔وسطی ایشائی ریاستاں نال تجارتی اتے اقتصادی تعلقات اچ بہتری آئی اے،1000،تاپی اتے ایران پاکستان گیس پائپ لائین جیہے توانائی دے وڈے منصوبیاں دے معاہدے طے تھی چکین ۔پاکستان دے اسلامی ملکاں نال تعلقات مذہبی،ثقافتی ،اتے تاریخی رشتیاں نال جڑیے ہوئیے ہن ۔روس کراچی توں لاہور تئیں گیس پائپ لائن منصوبے اچ2ارب ڈالر سرمایہ کاری کریندا پئے ۔ڈوہاں ملکاں وچال پہلا معاہدہ تھی گئے۔
