11مہینے دے دوران ٹیکسٹائل برآمدات وچ7.43فیصد گھٹکی

اسلام آباد ۔ 21 جون(اے پی پی) رواں مالی سال 2015-16ءدے پہلے یاراں مہیناں دے دوران ٹیکسٹائل دے شعبے دی برآمدات وچ7.43فیصد دی گھٹکی واقع تھئی ہے۔ ادارہ شماریات پاکستان (پی بی ایس) دے اعداد و شمار دے مطابق جولائی توںمئی 2015-16ءدے دوران ٹیکسٹائل دے شعبے دیاں برآمدات داحجم 11.468 ارب ڈالر تائیں گھٹ تھی گیا۔ رپورٹ دے مطابق جاری مالی سال دے دوران کارڈڈ اتے کومبڈ کاٹن دیاں برآمدات وچ سبھ توںزیادہ گھٹکی ریکارڈ کیتی گئی ہے جیرھی گزریل سال دے مقابلے وچ 97 فیصد اتے کاٹن یارن وچ 32 فیصد اتے خیمیاں تے ترپالاں وغیرہ دی قومی برآمدات وچ 26 فیصد دی گھٹکی ریکارڈ کیتی گئی ہے ۔ رپورٹ دے مطابق گزریل سال دے مقابلے وچ جاری مالی سال دے دوران ریڈی میڈ گارمنٹس دیاں برآمدات وچ 4.84 فیصد ودھارا تھیاہے اتے انہاں دی برآمدات 1.993 ارب ڈالر تائیں ودھ گئیاں۔ پی بی ایس دے اعداد وشمار دے مطابق جاری مالی سال وچ غذائی اجناس دیاں برآمدات وچ 12.78فیصد دی گھٹکی نال ایندا حجم 3.706ارب ڈالر جڈانجو چاول دیاں برآمدات وچ 9.77 فیصد دی گھٹکی نال برآمدات 1.716ارب ڈالر تائیں گھٹ تھی گئیاں ایں طرح مچھی اتے ایندیاں مصنوعات دی برآمدات وچ وی 5.92فیصد دی گھٹکی ریکارڈ کیتی گئی ہے۔