اسلام آباد ۔ 29 جولائی (اے پی پی) وفاقی وزیر برائے قومی تحفظِ خوراک تے تحقیق سکندر حیات بوسن آکھے جو شمسی توانائی توں ملنڑآلی نویں ٹیکنالوجی کوں فصلاں دی بڑھوتری کیتے استعمال اچ گھن آتے چنگے نتیجے حاصل کیتے ونج سگدے ہن ۔پی اے آر سی دے زرعی سائنسدان ملک کوں خوراک اچ خود کفیل بنڑاونڑ اچ آپنڑاں اہم کردارادا کریندے پئے ہن ۔ شمسی توانائی نال کھجور کوں سکاونڑ دے طریقے کوں اپناونڑ نال کھجور دی پیداوار اچ چنگا چوکھا ودھارا تھی سگدے ۔ زراعت دی پیداوار دے لحاظ نال صوبہ سندھ کوں ہک خاص مقام حاصل ہے۔ اے گالہیں انہاں شمسی توانائی نال کھجور کوں سکاونڑ دے طریقے تے فیلڈ ڈے دے موقعے تے خیرپور اچ زرعی سائنسداناں اتے کساناں نال خطاب کریندے ہوئیں آکھیاں ۔ انہاں آکھیا جو سندھ اچ باغبانی دی ترقی تے ترویج اتھاں مستقبل اچ محفوظ اتے مضبوط معاشی ترقی دی بنیاد فراہم کرسگدی ہے ۔ باغبانی دا شعبہ دیہات دے لوکیں دے روزگار کیتے مرکزی اتے قومی تحفظِ خوراک اتے ملک دی اقتصادی ترقی اچ اہم کردار ادا کریندا پئے ۔ ایں شعبے اچ ترقی بنیادی طور تے روزگار اتے دیہات دے علاقیاں دے سماجی تے معاشی استحکام دا ذریعہ وی ہے۔ باغبانی دا شعبہ پاکستانی معیشت اچ 11.8 فیصد دا حصے دارہے۔ باغبانی دے شعبے اچ کھجور سالانہ 6 لکھ ٹن پیداوار دے نال پاکستان دا ریجھا اہم پھل ہے ۔ پاکستان دی 50 فیصد توں ودھ کھجورسندھ اچ کاشت کیتی ویندی ہے ۔ انہاں آکھیاجو کھجوردی پیداوار دا شعبہ آجکل مسلیاں دا شکار ہے کیونجو کھجور کوں سکاونڑ اتے محفوظ کرنڑ کیتے مناسب سہولتاں کائنی جیئں پاروں اکثر ڈنگ کھجور دی بجائے چھوہارے اچ تبدیل کرڈتا ویندے جیہڑا جو گھٹ مُل تے وکدا ہے ۔ انہاں آکھیا جو پی اے آر سی دے سائنسداناں ڈنگ نال کھجور تیار کرنڑ کیتے شمسی توانائی نال چلنڑآلیاں مشیناں تیار کیتیاں ہن اتے انہاں مشیناں نال صاف ستھری اتے معیاری کھجور تیار تھیندی ہے ۔ انہاں آکھیا جو انہاں ٹیکنالوجیز کوں پھیلاونڑ کیتے وفاقی اتے صوبائی حکومت کوں بئے اقدامات کرنڑیں ہوسن تانجو لوکیں کوں ایندا فیدہ تھی سگے ۔
