اسلام آباد ۔ 19 جولائی (اے پی پی) پاک فوج دے شعبہ تعلقات عامہ (آئی ایس پی آر) دے ڈائریکٹر جنرل لیفٹیننٹ جنرل عاصم سلیم باجوہ آکھیا جو انفارمیشن بیسڈ آپریشن وچ سندھ ہائیکورٹ دے چیف جسٹس دے پُتر کوں بحفاظت بازیاب کرا گھدا گئے،اویس شاہ کوں افغانستان گھن ونجنڑ دی کوشش کوں ناکام بنڑا ڈتا گئے،آپریشن وچال ترائے دہشت گرد ماریے گئن۔منگل کوں انہاں پریس کانفرنس کریندیں ہوئیں ڈسایا جو سکیورٹی فورسز اتے انٹیلی جنس اداریاں چیف جسٹس دے مغوی پتر دی ممکنہ نقل و حرکت بارے خفیہ اطلاعات ملنڑ تے ڈیرہ اسماعیل خان اچ خارجی رستیاں دی چیکنگ کوں سخت کر ڈتا ،ایں وچال نیلے رنگ دی سرف گاڈی آئی تاں سکیورٹی اہلکار اونکوں رکنڑ دا اشارہ کیتا ،ڈروائیور گاڈی روکنڑ دی بجائے گاڈی ڈوجھے پاسے انجنڑ آلی سڑک تے چڑھا ڈتی جئیں تے سکیورٹی اہلکاراں ڈرائیور کوں نشانہ بنڑایا،ایں وچال پچھوں بیٹھے ہوئے بئے ڈو دہشت گرداں لتھے اتے بھجنڑ دی کوشش کیتی تاں فائرنگ دے تبادلے اچ ڈوہیں دہشت گرد ماریے گئے ۔انہاں ڈسایا جو ترائے دہشت گرداں دے مارے ونجنڑ دے بعد گاڈی دے اندر تلاشی شروع کیتی گئی تاں ہک پاسوں برقعہ اچ بیٹھے ہوئے بندے کوں شناخت ظاہر کرنڑ دا آکھیا گئیا تاں کافی کوشش دے بعد او نہ بولیا تاں نقاب ہٹایا گئیا تاں اوندے منہ تے ٹیپ لگی ہوئی ہئی ،سکیورٹی اہلکاراں ٹیپ لاتھی تاں نینگر ڈسایا جو میں چیف جسٹس سندھ ہائیکورٹ دا پتر اویس شاہ ہاں،میکوں کراچی توں اغواء کیتا گئیا ہئی جئیں تے سکیورٹی اہلکاراں اوں نینگر کوں نیڑے دے کیمپ منتقل کر ڈتا۔انہاں ڈسایا جو جئیں ویلھے اویس شاہ کوں بازیاب کرایا گئیا تاں اوں ویلھے اوندے ہتھ اتے پیر چین نال بدھیے ہوئیے ہن ۔ہک سوال دے جواب اچ انہاں ڈسایا جو کجھ ایجھی اطلاعات ملین جو اغواء کار اویس شاہ کوں مغربی سرحد توں افغانستان منتقل کرنڑ چاہندے ہن ۔
