انقرہ ۔ 24 جولائی (اے پی پی) ترکی دے وزیراعظم بن علی یلدرم آکھے جو سیکیورٹی فورسز ایوان صدر دی حفاظت دے ذمہ دار صدارتی گارڈز کوں تحلیل کیتا ویندا پئے ۔ ترک وزیراعظم ہک ٹی وی پروگرام اچ گالھ کریندے ہوئیں آکھے جو ہنڑ توں بعد کہیں صدارتی گاڈز نامی فورس دی لوڑ کائناںہوسی ، اساکوں ایں طرح دے اداریاں اتے لوکیں دی کئی لوڑ کائنی جیہڑے آپنڑیاں پیشہ وارانہ ذمہ داریاں ادا نہ کرسگن۔ انہاں اے بیان اوں ویلے جاری کیتے جیں ویلے صدر رجب طیب ایردوآن دی حفاظت تے مامور ادارے دے 283 اہلکاراں کوں حراست اچ گھداگئے ۔ ترکی اچ صدارتی محل دی حفاظت تے مامور صدارتی گارڈز اچ 2500 اہلکار شامل ہن ۔ انہاں دے خلاف تازہ کارروائی 15 جولائی کوں حکومت دا تختہ الٹنڑ دی ناکام سازش دے بعد جاری آپریشن کلین اپ دا حصہ ہے۔وزیراعظم آپنڑیں گالھ مہاڑاچ اشارہ ڈیندے ہوئیں آکھے جو سرکاری ٹی وی ‘ٹی آر ٹی’ دے ہیڈ کواٹر اچ داخل تھیونڑآلے اہلکاراں اچ صدارتی عملے دے اہلکار وی ملوث ہن ۔ انہاں نیوز کاسٹر کوں حکومت دا تختہ الٹنڑ اتے ملک اچ کرفیو نافذ کرنڑ دا اعلان پڑھ تے سنڑاونڑ تے مجبور کیتا ہئی ۔
