حکومت سارے شہریاں دے حقوق دے تحفظ اتے ترقی کیتے کم کریندی پئی ہے , وفاقی وزیر انسانی حقوق سینیٹر کامران مائیکل

اسلام آباد ۔ 27 جولائی (اے پی پی) وفاقی وزیر انسانی حقوق سینیٹر کامران مائیکل آکھے جو حکومت سارے شہریاں دے حقوق دے تحفظ اتے ترقی کیتے کم کریندی پئی ہے ۔ حکومت دے مجوزہ ایکشن پلان کیتے رقم ادارتی میکنزم کیتے رکھی گئی ہے ،اے رقم انسانی حقوق دی تعلیم، حساسیت، آگاہی، تحقیق و رابطہ، انسانی حقوق دے اداریاں دی ترقی تے خرچ کیتی ویسی، غریب متاثرین دی قنونی مدد کیتے وی انڈومنٹ فنڈ رکھیا گئے جیندی نگرانی کیتے ٹاسک فورس بنڑائی گئی ہے ۔ او بدھ کوں انسانی حقوق دے شعبے اچ کم کرنڑ آلے سانجھے داراں نال ملاقات اچ گالھ مہاڑ کریندے پئے ہن ۔ ایں بارے عملی اقدام چاونڑ کیتے وفاقی وزیراے تجویز پیش کیتی جو ایں کوں باقاعدہ منظم کرنڑ کیتے سرکاری اتے سول نمائندیاں دی ہک جماعت بنڑائی ونجے جیہڑی جو ملک اچ قنون دی حکمرانی کیتے ادارتی فریم ورک دے انضمام اتے مدد کیتے جائزہ گھنے ۔