سولر امپلس دنیا دا چکر پورا کر گھدا

ابو ظہبی۔ 26 جولائی (اے پی پی) شمسی توانائی دی مدد نال اڈنڑآلا جہاز سولر امپلس دنیا دا چکر پورا کرنڑ آلا ایجھا پہلا جہازبنڑ گئے جیں نے کامیابی دے نال ایہ سفر پوراکر گھداہے۔برطانوی نشریاتی ادارے دے مطابق سولر امپلس اپنڑی مہم دے چھیکڑی مرحلے وچ قاہرہ توں ابو ظہبی تائیں سفر تقریبا 48 گھنٹاں وچ طے کیتا۔گزریل سال 09 مارچ کو ایںجہاز دنیا دا چکر لاونڑ دی غرض نال ابوظہبی توں اپنڑے سفر دا آغاز کیتا ۔ہک بندے دی گنجائش آلے ایںجہاز کوں آندرے بورشبرگ اتے برٹرینڈ پیکارڈ مختلف مرحلیاں وچ واری واری اڈایا ہے اتے چھیکڑی پرواز دے پائلٹ برٹرینڈ پیکارڈ ہن۔ انھاں ابو ظہبی وچ جہاز کوں محفوظ طریقے نال لینڈ کیتا۔قاہرہ توں ابو ظہبی وچال دی پرواز وچ مشکللاںوی آئیاں۔ رستے وچ کئی جئیں تے گرم ہواواں نال بننڑن آلے گرداباں اتے خلل نال جہاز کوں محفوظ کرنڑ پیا۔ سعودی صحرا دے اوتے ہوا گھٹ ہائی جیندی وجہ نال جہاز دے انجن کوں زیادہ مشقت کرنڑپئی۔ اپنڑی پرواز دے دوران جہاز چار براعظماں، ترائے سمندراں اتے ڈ و بحیراں دا سفر کیتا۔ایندے وچ سبھ توں لمبا سفر جاپان دے شہر نگویا توں امریکا وچ ہوائی وچال دا سفر ہائی۔ ایہ سفر 118 گھنٹان وچ پرا تھیا۔ایں لمبے سفر دے نال پائلٹ بورشبرگ تن تنہا بغیر کہیں رکاوٹ دے جہاز اڈونڑدا ہک نواں عالمی ریکارڈ وی قائم کیتا ۔سولر امپلس ہنڑ تائیں 30 ہزار کلومیٹر دا سفر طے کر تے شمسی توانائی دی مدد نال دنیا دا چکر لاونڑ آلا پہلا جہاز بنڑ گئے۔