سیاسی طور ناکام حلقے مسلم لیگ ن دے خلاف مہم چلیندے پئن ،حکومت دے خلاف ساری سازشاں ناکام تھی ویسن،وفاقی وزیر احسن اقبال

اسلام آباد ۔ 18 جولائی (اے پی پی)وفاقی وزیربرائے منصوبہ بندی تے ترقی احسن اقبال آکھیا جو سیاسی طور ناکام حلقے مسلم لیگ ن دے خلاف مہم چلیندے پئن ،حکومت دے خلاف ساری سازشاں ناکام تھی ویسن کیونجو لوک گونگے اتے اندھے کائنی۔سونوار کوں ہک بیان اچ انہاں آکھیا جو حکومت دی پالیسیاں اچ استحکام اتے تسلسل پاروں اج پاکستان دنیا دی ودھدی ہوئی اٹھویں معیشت اچ رل گئے ۔2013ء اچ پاکستان دی معیشت لوڈے کھمدی پئی ہئی ۔ہنڑ پاکستان مثبت اتے مستحکم معیشت آلے پاسے ٹردا پئے۔انہاں آکھیا جو اج پاکستان سٹاک مارکیٹ 39000انڈکس کوں ٹپدی پئی اے۔انہاں آکھیا جو 2018ء تئیں نیشنل گرڈ اچ ڈاہ ہزار میگاواٹ بجلی رل ویسی جڈانجو 2025ء تئیں پندرہ ہزار ودھیکی بجلی شامل تھی ویسی۔