ضرب عضب نال امن و امان دی صورتحال چنگی تھی اے،صدر مملکت ممنون حسین دی ہالینڈ اچ پاکستان دی نامزد سفیر عفت عمران گردیزی نال ملاقات

اسلام آباد ۔ 19 جولائی (اے پی پی) صدر مملکت ممنون حسین آکھیا جو ضرب عضب نال امن و امان دی صورتحال چنگی تھی اے،پاکستان اچ سرمایہ کاری دے بے پناہ موقع موجود ہن جئیں نال ڈوجھے ملکاں کوں فائدہ چاونڑاں چاہیدا اے۔اے گالھ انہاں ہالینڈ اچ پاکستان دی نامزد سفیر عفت عمران گردیزی نال ملاقات کریندیں ہوئیں آکھی جنہاں ایوان صدر اچ انہاں نال ملاقات کیتی۔صدر مملکت ہالینڈ اچ بطور سفیر عفت عمران گردیزی کوں مبارک باد ڈتی۔انہاں امید کیتی جو انہاں دے دور اچ پاکستان اتے ہالینڈ دے تعلقات بئے مستحکم تھیسن ۔صدر مملکت آکھیا جو یورپی یونین دے تناظر اچ ہالینڈ نال پاکستان دے تعلقات بہوں اہم ہن ۔نامزد سفیر ہالینڈ اچ پاکستانی کمیونٹی دی فلاح و بہبود سانگے بنڑائے گئے منصوبیاں بارے صدر مملکت کوں ڈسایا۔