لاہور۔27 جولائی(اے پی پی )محکمہ تعلیم سکولز پنجاب استاداںدے تقرر تے تبادلے تے لاتی گئی پابندی مکا ڈتی۔سکول ایجوکیشن ڈیپارٹمنٹ ولوں بدھ دے ڈینھ جاری کردہ نوٹیفکیشن مطابق ایس ایس ٹی /ایس ایس ای،ای ایس ٹی/ایس ای ایس ای اتے پی ایس ٹی /ای ایس ای استاداںتوں 13اگست تئیں درخواستاں منگ گھدیاں ہن۔نوٹیفکیشن دے مطابق درخواستاں دی سکروٹنی ،میرٹ لسٹ اتے اعتراضات دی جانچ پڑتال دا عمل 13اگست توں 23اگست تائیں پورا کیتا ویسی ۔محکمہ سکولز ایجوکیشن ولوں تبادلے دے آرڈرز 24اگست توں 27اگست تئیں جاری کیتے ویسن جڈانجو تبادلہ کروانڑ آلے استاد 27اگست توں 31اگست تئیں اپنڑی نویں جاہ تے جوائننگ ڈیونڑ دے پابند ہوسن۔نوٹیفکیشن دے مطابق سرکاری سکولاں دے پرنسپل، ہیڈ ماسٹرز ،سینئر ہیڈ ماسٹرز،ہیڈ مسٹریس اتے سینئر ہیڈ مسٹریس سمیت سبجیکٹ سپیشلسٹ سانگے تقرر وتبادلے دا شیڈول وی جاری کیتا گئے،جیندے مطابق درخواستاں دی وصولی 19اگست توں 5ستمبرتئیں تھیسی جڈانجو درخواستاں دی سکروٹنی ،میرٹ لسٹ سمیت بئے معاملاں دی جانچ پڑتال 5ستمبر توں 12ستمبر تئیں تھیسی ۔نوٹیفکیشن دے مطابق سرکاری سکولاں دے پرنسپل ،ہیڈ ماسٹرز ،سینئر ہیڈ ماسٹرز،ہیڈ مسٹریس اتے سینئر ہیڈ مسٹریس سمیت سبجیکٹ سپیشلسٹ کوں تبادلے دے آرڈر13ستمبر توں 20ستمبرتئیں جاری کیتے ویسن جڈانجو مذکورہ عہدیدار 20ستمبر توں 26ستمبرتک اپنڑی نویں جاہ تے تعیناتی تے جوائننگ ڈیونڑ دے پابند ہوسن۔
