اسلام آباد ۔ 20 جولائی (اے پی پی) وفاقی وزیر امور کشمیر وگلگت بلتستان چوہدری برجیس طاہر مسئلہ کشمیر دے حل سانگے اقوام متحدہ سمیت عالمی برادری دے دوہرے معیار تے تشویش کریندیں ہوئیں آکھیا جو عالمی ادارے مشرقی تیمور اتے سوڈان اچ رائے شماری کراسگدے تاں مقبوضہ کشمیر اتے فلسطین دے معاملے تے رائے شماری کیوں نی کریندے پئے ،بین الاقوامی انسانی حقوق دے اداریاں کوں ہک لکھ کشمیریاں دی شہادت،30لکھ بیوہ تریمتیں اتے ہک لکھ بال یتیم تھیندے کیوں نی نظردی پئے ،پاکستان کشمیری عوام دی اخلاقی،سیاسی،سفارتی حمایت جاری رکھیسی۔او بدھ کوں مقبوضہ کشمیر اچ بھارتی فورسزدی بربریت،ماوارئے عدالت قتل،تریمتیں اتے بالاں دے وحشیایہ تشدد دے خلاف یوم سیاہ دے موقع تے وزارت امور کشمیر دے کمیٹی روم اچ پریس کانفرنس نال خطاب کریندے پئے ہن ۔انہاں آکھیا جو بدھ کوں پورے ملک بشمول گلگت بلتستان ‘آزاد کشمیر ‘فاٹااتے دنیااچ وسنڑ آلے پاکستانیاں یوم سیاہ بھرپور انداز اچ منایا،ساری قوم کشمیر نال اظہار یکجہتی کریندی پئی اے۔انہاں آکھیا جو بھارت یکا آکھدے جو مقبوضہ کشمیر اچ دراندازی پاکستان کرویندا پئے ،ولا سرحد تے دیوار اتے باڑ بنڑاونڑ دی گالھیں کیتی گئن جڈانجو عید دے ڈوجھے ڈینھ سری نگر اچ کشمیریاں دی پنجویں نسل دے 22سال دے نینگر برہان وانی کوں شہید کر ڈتا گئیا،برہان وانی کون اے،او ہک پروفیسر دا بال اے اتے مقبوضہ کشمیر دی پنجویں نسل دا نینگرا ے،ایں نینگر دی میت وی پاکستان قوم پرچم اچ ہئی اتے اوندے جنازے اچ پنج لکھ برہان وانی شامل تھیے اتے بھارت کوں ڈسایا جو نویں نسل اچ لکھاں وانی موجود ہن ،بھارتی سکیورٹی فورسز دی وحشانیہ فائرنگ نال بئے 40کشمیری شہید تھیے جڈانجو ایندے باوجود وی کشمیریاں دے حوصلے مَٹھے نی تھیے۔بھارت دی توپاں،اسلحہ اتے فوجی ایں تحریک کوں نی روک سگدے۔
