اسلام آباد ۔ 28 جولائی (اے پی پی) پاکستان ڈو ٹوک لفظیں اچ واضح کیتے جو مسئلہ کشمیر کوں ایجنڈے تے لاتے بغیر بھارت نال جامع مذاکرات نی تھی سگدے،بھارے نال جڈاں وی مذاکرات تھییے کشمیر بنیادی مسئلہ ہوسی،جنرل اسمبلی دے اجلاس اچ مسئلہ کشمیر بھرپور انداز اچ چیسوں،حریت رہنمائواں دی مسلسل نظر بندی دی مذمت کریندے ہیسے،افغانستان نال سرحد تے ٹریفک کنٹرول کرنڑ سانگے اقدامات کر گھدن ،بھارتی وزیر داخلہ راج ناتھ سنگھ سارک وزارتی اجلاس اچ شرکت سانگے اگلے مہینے پاکستان امسن،فیس بک توں کشمیر بارے پیج ہٹاونڑ اظہار رائے دی آزادی دی سنگین خلاف ورزی اے۔خمیس کوں ہفتہ وار پریس بریفنگ اچ دفتر خارجہ دے ترجمان محمد نفیس زکریا آکھیا جو کشمیر بارے پاکستان دا اصولی مئوقف واضح اے۔انہاں آکھیا جو مشیر خارجہ سرتاج عزیز مقبوضہ کشمیر اچ بھارتی مظالم بارے اقوام متحدہ دے سیکرٹری جنرل،اقوام متحدہ دی انسانی حقوق دی کونسل اتے او آئی سی دے سیکرٹری جنرل سمیت کئی عالمی اداریاں کوں خط بھیج ڈتن ،او آئی سی مقبوضہ کشمیر اچ بھارتی مظالم دا نوٹس گھدے ۔انہاں آکھیا جو کشمیر اساڈا قومی مقصد اے،پاکستان کشمیر دی عوام دی حق خودارادیت دی حمایت جاری رکھیسی،پاکستان مقبوضہ کشمیر اچ حریت رہنمائواں دی مسلسل نظر بندی دی مذمت کریندے ۔ہک سوال دے جواب اچ انہاں آکھیا جو پاکستان رینجرز اتے بھارتی بارڈر سکیورٹی فورسز وچال اجلاس ڈوہاں ملکاں اچ معمول دے انتظامات بارے اے۔اجلاس اچ بارڈر گرائونڈ رولز1960ء دے تحت آپریشنل معاملات تے بحث کیتی ویسی ،ڈو ڈینھ دا اجلاس جمعہ کوں لاہور اچ مکسی۔پاک افغان اتے امریکی سہ فریقی اجلاس بارے ترجمان آکھیا جو کابل اچ سہ فریقی اجلاس وچال ڈائریکٹر جنرلزملٹری آپریشنز( ڈی جی ایم اوز) سرحدی انتظام تے انصرام اتے سلامتی بارے تبادلہ خیال کیتے اتے بارڈر منیجمنٹ بارے معاملات طے کرنڑ سانگے طریقہ کار تے اتفاق کیتے ۔انڈونیشیا اچ پاکستانی شہری ذوالفقار کوں منشیات دے جرم اچ سزائے موت بارے سوال تے ترجمان آکھیا جو اساں امید کائنی چھوڑی اتے اخیری ویلھے تے آپنڑی کوششاں جاری رکھیسوں ،اساں انڈونیشئن حکام نال رابطے اچ ہیسے ۔
