اسلام آباد ۔ 20 جولائی (اے پی پی) وفاقی وزیر اطلاعات، نشریات تے قومی ورثہ سینیٹر پرویز رشید آکھیا جو مقبوضہ کشمیر اچ بھارتی بربریت دے خلاف پوری قوم وزیر اعظم محمد نواز شریف دی ہدایت تے یوم سیاہ منیندی پئی اے اتے انہاں دی آواز تے لبیک آکھدے ہوئے احتجاج کریندی پئی اے،بھارت کشمیری نینگراں کوں حق آزادی منگنڑ تے شہید کریندا پئے اتے انہاں کشمیریاں دا اے قصور اے جو انہاں آپنڑے بنیادی حق سانگے آواز چاتی اے بنیادی حق اقوام متحدہ سمیت سارے عالمی ادارے تسلیم کر چکین ،یوم سیاہ دا مقصد دنیا تئیں کشمیریاں دی آواز پجاونڑ اتے عالمی ضمیر کوں جنجھوڑنڑ اے،اقوام متحدہ وعدہ کیتا ہئی جو کشمیریاں کوں انہاں دی قسمت دا فیصلہ خود کرنڑ ڈتا ویسی اتے پاکستان انہاں دے ایں نصب العین دے حصول تئیں کشمیریاں دی حمایت جاری رکھیسی۔اے گالھیں انہاں بدھ کوں مسلم لیگ (ن) اسلام آباد پاروں نیشنل پریس کلب دے باہرریلی نال خطاب کریندیں ہوئیں آکھی۔ریلی دی قیادت وفاقی وزیر اطلاعات، نشریات و قومی ورثہ سینیٹر پرویز رشید، وزیراعظم دے معاون خصوصی ڈاکٹر آصف کرمانی اتے وزیر مملکت برائے کیپیٹل ایڈمنسٹریشن اینڈ ڈویلپمنٹ ڈاکٹر طارق فضل چوہدری کیتی۔شرکاء پلے کارڈ چاتے ہوئیے ہن جئیں تے مقبوضہ کشمیر اچ بھارت دی ریاستی دہشت گردی دے خلاف نعرے درج ہن ۔انہاں بھارتی حکومت دے خلاف اتے کشمیریاں دی آزادی دے حق اچ زبردستے نعرے لائے ۔ریلی اچ ہر شعبہ ہائے زندگی توں تعلق رکھنڑ آلے لوکاں شرکت کیتی۔
