اسلام آباد ۔ 15 جولائی (اے پی پی) وفاقی کابینہ دے خصوصی اجلاس وچ مقبوضہ کشمیر وچ بھارتی سیکیورٹی فورسز دے ہتھوں بے گناہ کشمیریاں دی شہادت اتے بھارتی مظالم دے خلاف آوندے منگل کوں یوم سیاہ مناونڑ دا اعلان کیتا ہے۔وفاقی کابنیہ دا خصوصی اجلاس وزیراعظم محمد نواز شریف دی صدارت وچ جمعہ کوں گورنر ہاﺅس لاہور وچ منعقد تھیا ۔وزیراعظم دی تجویز تے کابینہ مقبوضہ کشمیر وچ بھارتی مظالم دے خلاف یوم سیاہ مناونڑ دا فیصلہ کیتا۔کابینہ مقبوضہ کشمیر دی صورتحال تے غور سانگے پارلیمنٹ دا سانجھا اجلاس بلاونڑ دا وی فیصلہ کیتا ۔کابینہ دے خصوصی اجلاس نال خطاب کریندے ہوئیں وزیراعظم محمد نوازشریف آکھیا جو کشمیریاں دی تحریک ‘آزادی دی تحریک ہے اتے بھارت دا ظلم ایکوں ہور زیادہ تقویت ڈتی ہے، بھارت دی ست لکھ فوج کشمیر دی تحریک کوں دباسگیاں ہن اتے نہ دبا سگسن۔نواز شریف آکھیا جو اساں عالمی ضمیر کوں جگا ونڑ‘اساں بھارت دے غاصبانہ قبضے دے خلاف کشمیریاں دی اخلاقی‘سفارتی اتے سیاسی حمایت جاری رکھیسوں۔ انہاں آکھیا جو پاکستان دے سارے اداے بھارت دے غاصبانہ قبضے اتے کشمیر یاں تے مظالم کوں عالمی سطح تے اجاگر کریسن ۔وزیراعظم آکھیا جو برہان وانی آزادی داسپاہی ہائی ‘کشمیری اپنڑاں حق گھن تے راہسن ۔انہاں آکھیا جو میں اتے پاکستانی قوم اپنڑے کشمیری بھینڑبھراواںدے نال کھڑے ہن ۔قبل ازیں خارجہ سیکرٹری اعزاز چوہدری کابینہ کوں مقبوضہ کشمیر دی صورتحال بارے وچ بریفنگ ڈتی ۔وفاقی کابینہ سعودی عرب‘ترکی ‘بنگلہ دیشن ‘انڈونیشیا ‘فرانس وچ دہشت گردی دے حملیاں دی مذمت کریندے ہوئیںقیمتی جاناں دے ضیاع تے ڈکھ دا اظہار کیتا ۔کابینہ ممتاز سماجی ورکر عبدالستار ایدھی ‘معروف قوال امجد صابری اتے کشمیری شہداءسانگے فاتحہ خوانی وی کیتی ۔
