اسلام آباد ۔ 2 جولائی (اے پی پی) سیکرٹری خارجہ اعزاز احمد چوہدری آکھے جو پاکستان افغان مہاجرین دی باعزت اتے وقار نال واپسی چاہندے ۔پاکستان اتے افغانستان کو ں اے اہم معاملہ مذاکرات اتے مشاورت نال حل تے امریکہ یو این ایچ سی آر سمیت عالمی برادری کوں انہاں کوششاں اچ تعاون کرنڑاں چاہیدے ۔ اے گالہیں انہاں امریکہ دے خصوصی نمائندہ برائے افغانستان اتے پاکستان رچرڈ اولسن نال گالھ مہاڑکریندے ہوئیں آکھیاں،جنہاں چھنڑ چھنڑ کوں اتھاں سیکرٹری خارجہ نال ملاقات کیتی۔دفتر خارجہ دے ترجمان دے مطابق ملاقات دے دوران علاقائی صورتحال اتے افغانستان اچ امن و استحکام کیتے کوششاں بارے امور تے گالھ مہاڑ کیتی ۔ سیکرٹری خارجہ انسداد دہشت گردی اتے سیکورٹی ودھاونڑ سانگے پاک افغان سرحد تے موثر بارڈر منیجمنٹ بارے پاکستان دیاں کوششاں بارے ڈسایا۔ اعزاز چوہدری امریکی نمائندہ کوں بارڈر منیجمنٹ اتے سیکورٹی بارے مسلیاں کوں دور کرنڑ کیتے پاکستان اتے افغانستان وچال اعلی سطح تے مشاورت اتے طریقہ کار وضع کرنڑ بارے ڈسایا۔ افغان مہاجرین دی تکھے توں تکھے واپسی تے زور ڈیندے ہوئیں سیکرٹری خارجہ آکھے جو پاکستان افغان مہاجرین دی عزت اتے وقار نال واپسی چاہندے ۔ افغان مصلحتی کو ششاں بارے اعزاز چوہدری آکھیا جو افغان حکومت اتے لوکیں دی قیادت اچ مصالحتی عمل کیتے چار فریقی رابطہ گروپ موثر فورم ہے اتے پاکستان ایں بارے پورا تعاون کریسی۔ رچرڈ اولسن افغانستان اچ طویل المدتی امن و استحکام کیتے پاکستان دیاں کوششاں دی تعریف کیتی اتے آکھیا جو امریکہ بارڈر منیجمنٹ بارے پاکستان دیاں کوششاں دی حمایت کریندے ۔ انہاں تسلیم کیتا جو عالمی برادری کوں 35سال توں ودھ افغان مہاجرین دی میزبانی اچ پاکستان دے کردار کوں نہیں بھولنڑاں چاہیدا۔ رچرڈ اولسن پاکستان اتے امریکہ وچال باہمی مفاد دے معاملیاں تے مسلسل قریبی تعاون دی تعریف کیتی۔انہاں آکھیا جو معیشت دا استحکام اتے دہشت گردی دے خلاف جنگ اچ کامیابیاں بہوں شاندار ہن ۔ انہاں پولیو دے واقعات اچ کمی کرنڑ تے پاکستان کوں مبارخ دتی ۔
