چین نال انسداد دہشت گردی، سلامتی، خفیہ معلومات دے تبادلے اتے تجارت دے شعبیاں وچ وسیع تر تعاون پاکستان سانگے 21 ویں صدی وچ ہک فیصلہ کن پارٹنرشپ ہوسی سی پیک دی محفوظ اتے کامیاب تکمیل نال پاکستان اتے چین وچال یاری دیاں نویاں راہواں کھلسن،پاکستان سی پیک دے خلاف ہر طرح دیاں سازشاں کوں ناکام بنڑیسی وزیر داخلہ چوہدری نثار علی خان دی چین دے وزیر سلامتی جینگ ہوئی چانگ نال گالھ مہاڑ

اسلام آباد ۔ 14 جولائی (اے پی پی) وزیر داخلہ چوہدری نثار علی خان آکھیا اے جو پاکستان دا چین دے نال انسداد دہشت گردی، سلامتی، خفیہ معلومات دے تبادلے اتے تجارت دے شعبیاں وچ وسیع تر تعاون پاکستان سانگے 21 ویں صدی وچ ہک فیصلہ کن شراکت داری ہوسی۔ انہاں خیالیںدااظہار انہاں عوامی جمہوریہ چین دے وزیر برائے سلامتی جینگ ہوئی چانگ نال گالھ مہاڑ کریندے ہوئین کیتاجنہاں خمیس کوں اتھاں ہک اعلیٰ سطحی وفد دے کٹھے ملاقات کیتی۔ وزارت داخلہ ولوں جاری بیان دے مطابق چین دے اعلیٰ سطحی وفد وچ چین دے انسداد دہشت گردی، تکنیکی اتے انٹیلی جنس ڈویژنان دے اعلیٰ حکام شامل ہن۔ ملاقات وچ ڈوہائیں ملاکں دی سیکورٹی اسٹیبلشمنٹس وچال انٹیلی جنس معلومات دے تبادلے، انسداد دہشت گردی سانگے رابطیاں اتے چین پاکستان اکنامک کوریڈور (سی پیک) دی سیکورٹی سمیت مختلف اہم امور تے خیالیں دا تبادلہ کیتا گیا۔ وزیر داخلہ آکھیا جو سی پیک دی محفوظ اتے کامیاب تکمیل نال پاکستان تے چین وچال یاری دیاںراہواں کھلسن اتے ڈوہائیں ملکاں وچال اسٹریٹجک اتے اقتصادی تعلقات ہور زیادہ مستحکم ہوسن۔ انہاں آکھیا جو سی پیک نال پاکستان اتے چین کو ںخطے اتے ایندے توں وی اگو تائیں اپنڑی تجارت کوں فروغ ڈیونڑ دے مواقع میسر آوسن۔ انہاں آکھیا جو سی پیک پاکستان اتے چین وچال نہ صرف ہک انتہائی اہم منصوبہ ہے بلکہ ایہ پاکستان اتے چین دے تعلقات دے گھاٹے ہونڑ دا حامل وی ہے۔ انہاں آکھیا جو ڈوہائیں پاسیاں کوں انہاں علاقائی اتے عالمی طاقتاں توں محتاط رہونڑ چاہیدے جیرھے اپنڑے مفادات دی وجہ نال سی پیک دا منصوبہ نی چاہندے۔ وزیر داخلہ ایں عزم کوں دہرایا جو پاکستان سی پیک دے خلاف ساریاںسطحاں تے ہر طرح دیاں سازشاں کوں ناکام بنڑیسی۔ انہاں آکھیا جو ڈوہائیںملک دہشت گردی دے خلاف جنگ، انتہاءپسندی اتے تشدد کوں مکاونڑ سانگے انٹیلی جنس معلومات دے تبادلے کوں وختی ودھاونڑ چاہندن۔ وزیر داخلہ آکھیا جو پاکستان انہاں ساریاں دہشت گرد گروپان دے خلاف جنگ جاری رکھیسی جیرھے پاکستان وچ گڑ بڑ پیدا کرنڑ اتے تشدد کھنڈاونڑ چاہندن۔ انہاں آکھیا جو پاکستان کہیں وی گروپ کوں پاکستان توں باہروںتشدد سانگے اپنڑی سرزمین استعمال کرنڑ دی اجازت نہ ڈیونڑ دا عزم کیتے ہوئے ہے۔ دہشت گرد گروپاں دے خلاف جاری جنگ دے حوالے نال اظہار خیال کریندے ہوئیں وزیر داخلہ چوہدری نثار علی خان آکھیا جو آپریشن ضرب عضب دے ثمرات آونڑ شروع تھی گئے ہن۔ پاکستان وچ سی پیک سمیت مختلف ترقیاتی منصوبیاںوچ کم کرنڑ آلے چینی شہریاں دی سلامتی دے حوالے نال وزیر داخلہ آکھیا جو چینی کارکنان دے تحفظ سانگے پاک فوج دی سربراہی وچ سپیشل سیکورٹی ڈویژن پہلے ای کم کریندی پئی ہے ۔ عوامی جمہوریہ چین دے وزیر برائے سلامتی جینگ ہوئی چانگ دہشت گردی دے خلاف جنگ بالخصوص آپریشن ضرب عضب وچ حاصل تھیونڑ آلیاں کامیابیاں کوں سراہایا۔ ڈوہائیں ملکاں وسیع تر تکنیکی تعاون اتے روابط دے ذریعے اطلاعات اتے انٹیلی جنس معلومات کوں ہور مستحکم بناونڑ تے اتفاق کیتا۔