اسلام آباد ۔ 27 جولائی(اے پی پی) وفاقی وزیر تجارت خرم دستگیر خان آکھے جو یمن اچ قید بندیاں دی شہریت دی تصدیق کیتی ویندی پئی ہے ،ایں بارے سفارتی رابطے جاری ہن ، جیکر کئی پاکستانی یمن اچ قید ہویاتاں اوں کوں واپس گھن آونڑ کیتے سارے وسائل استعمال اچ گھن آئے ویسن۔بدھ کوں ایوان بالا دے اجلاس اچ سینیٹر مشاہد حسین سید دے توجہ ڈیوائو نوٹس دے جواب اچ انہاں آکھیا جو یمن دی صورتحال خراب تھیونڑ دے بعد اتھاں پھسنڑ آلے پاکستانیاں کوں واپس گھن آونڑ کیتے حکومت خصوصی پروازاں دا انتظام کیتے ۔ جتھاں تئیں یمن دی جیل اچ پاکستانیاں دی موجودگی دا تعلق ہے ایں بارے کجھ خبراں دے مطابق انہاں دی تعداد 22اتے کجھ دے مطابق 10 یا 6 ہے جڈانجو حالی تئیں انہاں لوکیں دی شہریت دی تصدیق کائنی تھی سگی ۔ایں بارے اساڈا اسلام آباد اچ یمن دے سفارتخانے دے حکام نال رابطہ ہے جڈانجو ریاض اچ پاکستان دا سفارتی عملہ وی متعلقہ حکام دے نال رابطے اچ ہے ۔ انہاں آکھیا جو وزارت داخلہ کوں وی انہاں لوکیں دی شہریت دی تصدیق کیتے خط لکھ ڈتا گئے ۔ انہاں آکھیا جو حکومت آپنڑیں شہریاں دی ہر ممکن مدد کریسی ۔ شہریت دی تصدیق تھیونڑ دے بعد یمن اچ موجود پاکستانیاں کوں واپس گھن آونڑ کیتے بھرپور اقدامات کیتے ویسن۔
