اسلام آباد ۔ 13 اگست (اے پی پی) افغانستان دے صوبے لوگر اچ کریش لینڈنگ کرنڑآلے پنجاب حکومت دے ہیلی کاپٹر دا چھی رکنی عملہ بازیابی دے بعد چھنڑ چھنڑ کوں اسلام آباد پج گئے ۔ عملے دے سارے رکن محفوظ اتے صحت مند ہن ، دفتر خارجہ دے ترجمان دے مطابق عملے دے ارکان کوں فاٹا اچ پاک افغان سرحد تے قبائیلی عمائدین دے حوالے کیتا گئے جنہاں کوں فاٹا توں ہیلی کاپٹر دے زریعے اسلام آبادپجایا گئے ۔ عملے دے رکناں اچ کیپٹن صفدر حسین(چیف پائلٹ)،کیپٹن صفدراشرف،کیپٹن محمد شفیق الرحمان(فرسٹ آفیسر)،ناصر محمود(فلائیٹ انجینئر)،محمد کوثر(کریو چیف) اتے سرگئی سیوستیانوف(روسی نیوی گیٹر)شامل ہن ۔ پنجاب حکومت دا ہیلی کاپٹر ایم آئی ۔17 معمول دے مطابق مرمت سانگے روس ویندے ہوئیں 4اگست کوں افغانستان دے صوبے لوگر اچ کریش لینڈ کر گیا ہئی جتھاں عملے دے ارکان کوں یرغمال بنڑا گھدا گیا ہئی ۔
