اٹلی اچ زلزلے نال ہلا ک تھیونڑ آلیاں دی تعداد247 تھی گی ،زخمیوں دی حالت نازک

روم ۔ 25 اگست (اے پی پی) اٹلی دے وسطی حصیں اچ بدھ کوں آونڑ آلے زلزلے نال ہلاک تھیونڑ آلیاں دی تعداد 247تھی گی ۔حکام دے مطابق زلزلے پاروں زخمی تھیونڑ آلیں دی تعداد سینکڑاں اچ ہے جیں اچوں کئی دی حالت نازک ہے جڈاں جو نا معلوم تعداد اچ لوک ملبے تلے ہن جنہاں دی گول سانگے امدادی سرگرمیاں جاری ہن ۔فرانسیسی خبر رساں ادارے دے مطابق ترک حکام دے حوالے نال ڈسایا جو ملبے تلے ودھ توں ودھ لوکاں زندہ کڈھنڑ سانگے درجناں امدادی اداریں دے کارکناں امدادی سرگرمیاں رات کوں وی جاری رکھن۔متاثر علاقیںا چ رہنڑ آلے سینکڑاں لوکاں بدھ کوں تے خمیس دی وچلی رات آفٹر شاکس دے ڈر توں ودھ ساری سردی اچ گھراں توں باہر خیمے اچ گزاری ۔زلزلے نال متاثرہ علاقیں اچ درجناں عمارتاں ملبے تلے ڈھیر بنڑ گیاں ۔اٹلی دی سول پروٹیکشن ڈیپارٹمنٹ ایٹی صوبے اچ 90تے ایسکولی پے سیفر صوبے اچ 57موتاں تھیونڑ دی تصدیق ہے ۔زلزلے نال متاثر علاقے ماٹرائس اچ ہلاک تھیونڑ آلیں دیاں لاشاں کھیڈ دے میدان اچ رکھیاں ہن ۔حکام بدھ کوں آونڑ آلے زلزلے کوں اٹلی اچ 2009دے بعد آونڑ آلا شدید زلزلہ قرار ڈتا ہے ۔