اسلام آباد ۔ 5 اگست (اے پی پی) اوور سیز پاکستانیز فائونڈیشن (او پی ایف )دے مینجنگ ڈائریکٹر حبیب الرحمان گیلانی آکھے جو حکومت اتے پاکستانی سفارتخانے دیاں کوششاں نال سعودی حکومت اتھاں مشکلاں دا شکار پاکستانیاں کوں ڈی پورٹ کرنڑ دے عمل کوں روک ڈتے جڈانجو پاکستانی سفارتخانے ملازماں ولوں قنونی ہتھ پیر مارنڑ کیتے خصوصی سیل وی قائم کرڈتے ۔ پی ٹی وی نال گالھ مہاڑ کریندے ہوئیں انہاں آکھیا جو سمندر پار پاکستانی اساڈا سرمایہ ہن اتے موجودہ حکومت انہاں کوں ہرممکن امدادڈیونڑ اتے انہاں دیاں مشکلاں حل کرنڑ سانگے کوششاں کریندی پئی ہے ۔ انہاں سعودی عرب اچ پاکستانیاں دیاں مشکلاں دا ذکر کریندے ہوئیں آکھیا جو عالمی سطح تے تیل دا کاروبار بحران دا شکار ہے جئیں پاروں سعودی عرب اچ سعد ٹریڈنگ کمپنی اتے سعودی اوگا کمپنیاں کوں ملازماں دیاں مزدوریاں دی ادائیگی اچ اوکھ پاروں بہوں سارے ملازماں کوں نوکریاں توں فارغ کرنڑاں پئے جنہاں اچ پاکستانی ملازم وی شامل ہن ۔ انہاں آکھیا جو پاکستانیاں دے مسلیاں کوں ڈیکھدے ہوئیں سعودی عرب اچ پاکستانی سفیر سعودی وزارت مین پاور کوں انہاں مسلیاں بارے ڈسایا ہے جیندے تے سعودی حکومت متاثرہ بندیاں کوں ملک واپس پٹھنڑ دا عمل روک ڈتے ۔
