اسلام آباد ۔ 31 اگست (اے پی پی) وزیراعظم محمد نوازشریف ولوںمقبوضہ کشمیر اچ پرامن جدوجہد کرنڑ آلیں دے خلاف بھارتی ظلم تے عالمی توجہ ڈیواونڑ سانگے نامزد خصوصی نمائندیں سردار اویس احمد خان لغاری اتے مسلم لیگ ن دے رکن قومی اسمبلی محمد پر ویز ملک آکھیا ہے جو مقبوضہ کشمیر اچ بھاتی ظلم تے عالمی برادری دی خاموشی معنی خیز ہے ۔عالمی برادری اپنڑاں دوغلا کردار ترک کریندے ہوئیں کشمیریاںکوں اقوام متحدہ دیاں ولوں منیے گے حق خود ارادیت ڈیواونڑ سانگے اپنڑاں کردار اداکرے ۔کشمیر دے جھیڑے دے حل سانگے عالمی طاقتاں کوں اپنڑں کردار ادا کرنڑاں ہوسی ،مقبوضہ کشمیر اچ انسانی حقوق دیاں خلاف ورزیاں افسوسناک ہن ۔بدھ کوں اے پی پی نال گالھ مہاڑ کریندے ہوئیں مقبوضہ کشمیر اچ موجود انسانی حقوق دیاں خلاف ورزیاں تے کشمیر کاز دی لابنگ سانگے وزیراعظم محمد نوا ز شریف دے اقوام متحدہ (جینوا ) سانگے نامزد نمائندے تے قومی اسمبلی دی خارجہ امور کمیٹی دے چیئر مین اویس احمد خان لغاری آکھیا جو مختلف ملکاں اچ نمائندے بھجواونڑ دا مقصد عالمی برادری کوں کشمیر دے مسلے دے حوالے نال ایندے کردار دا احساس ڈیواونڑ ہے جو جیرھے جمہوری تے انسانی اصولاں دی او گالھ کریندے ہن اتے ایں بنیاد تے مختلف ملکاں نال اپنڑے تعلقات بنڑیندے ہن انہاں اصولاں کوں کشمیر دے لوکاں سانگے استعمال کیوں نی کریندے ،انہاں دے جذبات کشمیریاں سانگے اونویں کیوں کائنی ۔
