اسلام آباد ۔ 10 اگست(اے پی پی) وفاقی وزیر داخلہ چوہدری نثار علی خان آکھے جو موجودہ حکومت دے اقتدار اچ آونڑ دے بعد ترائے سالیں اچ 2 لکھ 37 ہزار شناختی کارڈ بلاک کیتے گئے ہن ، ملا منصور پاکستان دا شہری کائناں ہئی ، ملا منصور کوں 2005ء اچ پاسپورٹ جاری تھیا جڈانجو ایندی تجدید 2011ء اچ تھئی ،ایں پاسپورٹ اتے شناختی کارڈ اُتے اے بندہ ایران’ بحرین’ متحدہ عرب امارات گیا۔ ایف آئی اے دے ڈو افسر ملازمت توںہٹھ دھو بیٹھے ہن ۔ ترائے نادرا اہلکار گرفتار تھئے ہن ۔ پٹواری دے خلاف کارروائی تھئی ہے ۔ سارے ذمہ داراں کوں پکڑا گئے ۔ بلوچستان دی حکومت تعاون کیتے ۔اساں ایندے ذمہ داراں دے خلاف بھرپور کارروائی کیتی ہے ۔ قومی شناختی کارڈز دی تصدیق دی نگرانی کیتے پارلیمنٹ دی اوورسائٹ کمیٹی بنڑاونڑاں چاہندے ہئیں ، تصدیقی عمل اچ ہنڑ تئیں ساڈھے ترائے کروڑ شناختی کارڈز دی تصدیق تھئی ہے ، فیملی ٹریز نال ہزاراں غیر قنونی شناختی کارڈز دی نشاندہی تھئی ہے ۔ بدھ کوں قومی اسمبلی دے اجلاس اچ سوالیں دے وقفے اچ وزیر داخلہ چوہدری نثار علی خان آکھیا جواے بہوں اہم معاملہ ہے ۔ جعل سازی دنیا اچ ہر جاہ تے تھیندی پئی ہے ۔ نیشنل ڈیٹا بیس اتھارٹی 2013ء توں پہلے 525 شناختی کارڈ بلاک کیتے ہن ۔ اساڈے ترائے سالیں اچ ڈو لکھ 37 ہزار کارڈ ز بلاک تھئے ہن ۔ 29 ہزار پاسپورٹ منسوخ تھئے ہن ۔ شناختی کارڈ دی تصدیق نا ل ہنڑ تئیں ساڈھے ترائے کروڑ شناختی کارڈ دی تصدیق تھی گئی ہے ۔ لوکیں اتے میڈیا ودھ سارا تعاون کیتے ۔ ہر کہیں آکھیا ہئی جو چھی مہینے اچ کائناں تھی سگسی جڈانجو اساں ڈیڈھ مہینے اچ ہک وڈی تعدار کرڈیکھائی ہے ۔ ہزاراں دی تعداد اچ فیملی ٹریز اچ اجنبی نکلے ہن ۔ ہزاراں غیر ملکی وی نکلے ہن ۔ انہاں ایں عمل اچ نگرانی سانگے پارلیمانی کمیٹی بنڑاونڑ دی تجویز ڈتی ہے۔ انہاںڈسایا جو ایں توں پہلے وی سپیکر نال گالھ کیتی ہے ۔ ایں کمیٹی کوں تصدیق یا بلاک کیتے ونجنڑآلے شناختی کارڈ بارے آگاہ کیتا ویسی ۔ شناختی کارڈ بلاک کرنڑتے تنقید کریندے ہو تاں نال ایں بارے تجویزاں وی ڈیو۔
