وزیراعظم محمد نواز شریف دا پاک چین اقتصادی راہداری دے تحت توانائی اتے بنیادی ڈھانچے دے جاری منصوبیاں تے کم دی رفتار تے تسلی دا اظہار

اسلام آباد ۔ 18 اگست (اے پی پی) وزیراعظم محمد نواز شریف پاک چین اقتصادی راہداری دے تحت توانائی اتے بنیادی ڈھانچے دے جاری منصوبیاں تے کم دی رفتار تے تسلی دا اظہا ر کریندے ہوئیں ہدایت کیتی ہے جو سارے منصوبیاں دی ڈتے گئے ویلھے دی سختی نال پیروی کیتی ونجنڑیں چاہیدی ہے ۔ خمیس کوں وزیراعظم ہائوس اچ کابینہ اجلاس دی صدارت کریندے ہوئیں وزیراعظم آکھے جو جیکر اساں جاری منصوبیاں دے پھل توں فیدہ چاونڑاں چاہندے ہئیں تاں توانائی اتے بنیادی ڈھانچے دی لوڑ بارے اساڈی آندی منصوبہ بندی پہلہ ترجیح ہونڑیں چاہیدی ہے ،جڈانجو ایں گالھ کوں گزریل حکومتاں نظر انداز کیتے ۔ وزیر ہائوسنگ تے تعمیرات کابینہ کوں نجی شعبے نال رل تے لینڈ بینکنگ کیتے سانجھی منصوبہ بندی پالیسی بارے ڈسایا۔ کابینہ وزارت دی تجویز دی اصولی منظوری ڈے ڈتی اتے ایں کوں بیاں چنگا بنڑاونڑ دافیصلہ کیتا۔ کابینہ مجوزہ ہائوسنگ پالیسی بارے وزیر ہائوسنگ و تعمیرات، وزیر داخلہ، وزیر قنون اتے چئیرمین سی ڈی اے تے مشتمل چار رکنی کمیٹی بنڑاڈتی گئی ۔ وفاقی کابینہ ”کوڈ آف کریمینل پروسیجر(ترمیم) ایکٹ 2016ئ” دے مجوزہ مسودہ بل تے صوبیاں دی رائے گھنڑ دا فیصلہ کیتاجیویں جو وزیراعظم ولوں بنڑائی گئی قنونی اصلاحات کمیٹی سفارش کیتی ہے۔ کابینہ پاکستان اتے ترکمانستان وچال دفاعی پیداوار دے ایم او یو دی منظوری ڈتی ۔ پاکستان اتے جاپان (جائیکا) وچال توانائی دے شعبیاں دی اصلاحات دے پروگرام IIکیتے قرض معاہدے تے دستخط دی وی موثر بہ ماضی منظوری ڈتی گئی ۔ کابینہ سرکاری شعبے دی آڈیٹنگ اچ تعاون بارے ملائیشیا دے نیشنل آڈٹ ڈیپارٹمنٹ اتے پاکستان دے آڈیٹر جنرل دفتر وچال مفاہمت دی یادداشت تے گالھ مہاڑ دی اصولی منظوری ڈتی۔ ایندے علاوہ سرکاری شعبے دی آڈیٹنگ اچ تعاون بارے ویتنام دے اسٹیٹ آڈٹ آفس اتے سپریم آڈٹ انسٹیٹیوشن آف پاکستان وچال ڈوطرفہ مفاہمتی یادداشت تے دستخط دی وی منظوری ڈتی گئی ۔ کابینہ اسٹیٹ بینک آف پاکستان اتے روس دے مرکزی بینک وچال بینکاری نگرانی تعاون بارے مفاہمتی یادداشت تے دستخط کیتے گالھ مہاڑ شروع کرنڑ دی منظوری ڈتی ۔ پاکستان اتے ترکمانستان وچال سفارتی پاسپورٹ رکھنڑآلیاں دے ویزہ ختم کرنڑ دے معاہدے تے دستخط دی وی منظوری ڈتی گئی ۔ پاکستان اتے قزاخستان وچال مجرماں دے تبادلے بارے معاہدے تے دستخط وی وی منظوری ڈتی گئی ۔ پاکستان اتے کینیا وچال غیرقنونی نقل و حرکت اتے منشیات دی روک تھام اچ گانڈھے بارے مفاہمتی یادداشت تے دستخط بارے گالھ مہاڑ شروع کرنڑ دی وی منظوری ڈتی گئی ۔