اسلام آباد ۔ 31 اگست (اے پی پی)وفاقی کابینہ وزیر اعظم دے پائیدار ترقیاتی اہداف دے پروگرام،بین العلاقائی رابطے سانگے موٹر وہیکل اینڈ ریلویز دے سارک معاہدے سمیت کئی ایجنڈا آئٹمز دی منظوری ڈے ڈتی اے جڈانجو روپے دے سکے دی تبدیلی،10روپے دا سکہ متعارف کراونڑ دی منظوری،مہلک بیماریاں اچ مبتلا شہریاں دے علاج بارے فیصلہ،ٹیکس قوانین ترمیمی آرڈیننس 2016اتے پٹرولیم مصنوعات تے سیلز ٹیکس دے تعین ،کئی بین الاقوامی معاہدیاں دی منظوری،کابینہ کمیٹی برائے نجکاری دے اجلاساں اچ کیتے گئے فیصلیاں دی توثیق،نان فائلرز سانگے ود ہولڈنگ ٹیکس دی گھٹ شرح اچ 31دسمبر تئیں دی توسیع کر ڈتی گئی اے۔کابینہ دا اجلاس بدھ کوں وزیر اعظم محمد نواز شریف دی صدارت اچ ایوان وزیر اعظم اچ تھیا۔کابینہ دوہرے ٹیکس توں گریز اتے آمدنی تے ٹیکساں بارے مالیاتی چوری دی روک تھام سانگے پاکستان اتے چین وچال معاہدے تے دستخط سانگے تریجھے پروٹوکول اتے ابتدائی مسودے تے دستخط دی منظوری ڈتی گئی ۔کابینہ 14ستمبر2016ء کوں پیرس اچ او ای سی ڈی سیکرٹریٹ اچ وزیر خزانہ اسحاق ڈار ولوں ٹیکس امور اچ آپسی انتظام معاونت بارے کثیر الطرفہ کنونشن تے وی دستخط دی منظوری ڈتی،وفاقی کابینہ 29اگست2016ء کوں اقتصادی رابطہ کمیٹی دے فیصلیاں دی وی توثیق کیتی۔
